“Grupi i personave që e ka pritur djalin tim pas shkollës, një ditë më herët ka publikuar në “Facebook” dhe Instragram, postime ku thuhej ‘nesër prehet shiptari’ dhe ‘kush do ta mbijetojë të hënën do të tregojë për të’”, thotë për Radion Evropa e Lirë, Nenad Rashic, lideri i Partisë Demokratike Progresive në Kosovë. Ai më pas, në një konferencë për media në “Qendrën Mediale” në Çagllavicë i bëri publike këto postime.
Djali i Rashicit, Nikolla është sulmuar të hënën, më 22 shkurt, në Llapnasellë të Graçanicës, komunë e banuar me shumicë serbe.
Policia e Kosovës në një përgjigje me shkrim për REL, ka konfirmuar se në këtë “rrahje masive kanë marrë pjesë nxënës të shkollës së mesme, por edhe disa persona të tjerë” dhe se një person ka marrë lëndime të rënda trupore dhe më pas është dërguar në spital.
Për këtë rast, Policia ka ndaluar tetë persona, në mesin e të cilëve edhe një person i mitur. Ndaj tetë personave është caktuar masa e ndalimit prej 48 orësh, për shkak se ata dyshohen se kanë marrë pjesë në rrahje.
Nga Prokuroria Themelore në Prishtinë thanë për REL se Prokurori i Shtetit do të bëjë kërkesë për masën e paraburgimit ndaj të ndaluarve.
Si ndodhi sulmi?
Djali i Nenad Rashiqit, Nikolla, 18 vjeç, është nxënës i vitit të fundit të gjimnazit në Llapnasellë dhe sulmi ndodhi derisa ai ishte duke dalë nga shkolla.
Drejtori i gjimnazit, Dejan Denic tha për Radion Evropa e Lirë se Nikolla nuk ka qenë “adoleshent problematik”.
“Sipas informatave që i kemi, rrahja ka ndodhur për shkak të disa arsyeve private, që nuk kanë të bëjnë me shkollën”, tha ai.
Nenad Rashic thotë për REL se grupi i të rinjve e kanë pritur djalin e tij para shkollës dhe së pari kanë filluar që ta fyejnë dhe pastaj e kanë sulmuar fizikisht, duke e rrahur me “boks të hekurit” në kokë.
“I janë afruar djalit tim dhe i kanë thënë ‘çka bën tash, ti shiptar’”, tregoi Rashic. “Shiptar” është term pezhorativ që përdoret në gjuhën serbe ndaj shqiptarëve.
Nikollës i është thyer nofulla dhe tri dhëmbë.
“Djali im ishte objektivi. Sipas mendimit tim, kjo ishte tentativë-vrasje”, thotë Rashic. Ai mendon se e gjithë kjo është “pasojë e kundërshtimit të tij shumëvjeçar ndaj presioneve politike”.
Gjatë konferencës për media, Rashic tha se politikanët me deklarata “të papërgjegjshme” kanë ndikuar në acarimin e situatës. Ai po ashtu tha se ka kërkuar nga Prokuroria që të hetojë të gjitha postimet e politikanëve, që përmbajnë etiketime të ndryshme, duke mos specifikuar se për cilët politikanë bëhet fjalë.
Rashic po ashtu u shpreh se pas sulmit ndaj djalit të tij, Policia i ka ofruar mbrojtje, por ai nuk e ka pranuar.
Rashic është kundërshtar politik dhe kritik i zëshëm i Listës Serbe, subjekt politik në Kosovë, që prej formimit më 2013, është i vetmi përfaqësues i komunitetit serb në institucionet e Kosovës. Ky subjekt gëzon mbështetje të plotë të Beogradit zyrtar, por edhe të shumicës së trupit elektoral të komunitetit serb në Kosovë.
Rashiqi disa herë është kritikuar nga Lista Serbe dhe zyrtarët në Serbi për qëndrimet e tij. Ditëve të fundit ai ka folur hapur se si Lista Serbe po u bën presion votuesve serbë për të votuar për Adrijana Hoxhicin dhe subjektin e saj “Komuniteti i Bashkuar”, duke ua privuar rivalëve politikë boshnjakë përfaqësimin në Kuvendin e Kosovës.
Çfarë thotë Lista Serbe për sulmin në Llapnasellë?
Fillimisht, Lista Serbe e dënoi sulmin ndaj djalit të Nenad Rashicit, për të deklaruar disa orë më vonë, përmes një njoftimi për media, se “Rashici është i gatshëm ta keqpërdorë fëmijën e tij për të përfituar poenë të ulët politikë”.
“Kjo rrahje si dhe lëndimet që i ka marrë Nikolla, nuk kanë lidhje me politikën dhe Listën Serbe, pa marrë parasysh sa Albin Kurti dhe Rashici tentojnë ta paraqesin si të tillë dhe të marrin ndonjë poenë politikë”, thuhet në komunikatën e Listës Serbe.
Të hënën, para se të ndodhte sulmi, nënkryetari i Listës Serbe, Dalibor Jevtic, ka shkruar në Twitter, se Rashici gjatë fushatës zgjedhore “ia premtoi veten shqiptarëve dhe kërkoi që të votojnë për ta shkatërruar Listën Serbe”.
Dënim i sulmit
Ushtruesja e detyrës së presidentit në Kosovë, Vjosa Osmani ka thënë se sulmi ndaj djalit të Rashicit është akt kundër demokracisë dhe lirisë së individit.
“Ftoj organet e rendit që sa më shpejt t’i sjellin para drejtësisë autorët e krimit. Është tashmë e qartë që sulmi ndaj tij është në vazhdën e kërcënimeve të shumta e ndërhyrjeve ilegale të Serbisë në Kosovë, që kanë për qëllim frikësimin e qytetarëve serbë”, është cituar të ketë thënë Osmani sipas një komunikate për media të presidencës.
Ndërkaq, kryeministri në detyrë, Avdullah Hoti tha se kryesit e këtij sulmi, duhet “të përballen me forcën e ligjit”.
“Dhuna është e papranueshme dhe e dënueshme”, tha Hoti.
Lidhur me këtë incident ka reaguar edhe kryetari i Lëvizjes Vetëvendosje, Albin Kurti, partia e të cilit ka fituar zgjedhjet parlamentare të 14 shkurtit në Kosovë.
Përmes një postimi në rrjetin social Facebook, Kurti ka thënë se sulmi ndaj djalit të Rashicit mund të jetë i organizuar dhe ka të bëjë me veprimtarinë e babait të tij.
“Në qeverinë tonë të re do të punojmë që të gjithë qytetarët e Kosovës pa dallim përkatësie kombëtare të jetojnë të sigurt”, është thënë në reagimin e Kurtit.
Ambasadori britanik në Kosovë, Nocolas Abbott, i cili ka kërkuar hetimin e sulmit, ka thënë po ashtu se gjuha e urrejtjes, e promovuar nga disa politikanë, duhet të ndalet.
“Disa politikanë kanë promovuar kulturë të urrejtjes dhe frikës, mosbesimit dhe tradhtisë brenda dhe në mes të komuniteteve. Sërish u bëjmë thirrje që kjo të ndalohet. E gjithë klasa politike dhe mediat duhet të reflektojnë dhe ta kuptojnë se lejimi i zhvillimit të kësaj kulture, i vë njerëzit në rrezik”, ka shkruar ai në Twitter. /REL/
