Kryeministri Edi Rama ka folur për ngërçin në BE që mban të bllokuar rrugën e Shqipërisë dhe Maqedonisë së Veriut për hapjen e negociatave.
Gjatë një bashkëbisedimi në qendrën “Balon” në Amsterdam, Rama theksoi se BE duhet të ndryshojë qëndrim dhe të mos e lërë historinë në duart e politikanëve. Po ashtu nuk kanë munguar sulmet ndaj Bullgarisë, të cilën e akuzoi sërish si frymën e devijuar të Unionit.
“E gjitha kjo është një turp, por një turp që lidhet me frymën e zgjerimit. Bullgaria është shembulli më i jashtëzakonshëm i kësaj fryme të devijuar”- tha Rama, ndërsa tregon se ku do të shkonte populli i Ballkanit nëse do të ecte me mendësinë e bullgarëve sa i përket prejardhjes dhe historisë.
“Ne jemi Ballkani që vjen me disa telashe, ne duam të jemi pjesë e BE-së dhe më pas nëse vende si Bullgari në këtë rast e përdorin veton për të diskutuar historinë në nivele politike kjo është edhe më e ndërlikuar. Përgjithësisht mendoj se sa herë historia merret nga politikanët për tu zgjidhur, rezultati më i mundshëm është që historia të ndërlikohet edhe më shumë. E gjitha kjo është një turp, por një turp që lidhet me frymën e zgjerimit. Bullgaria është shembulli më i jashtëzakonshëm i kësaj fryme të devijuar. BE duhet të ndryshojë, nuk duhet të funksionojë më kështu, që një vend merr peng një vend tjetër. Por nëse hyn në Ballkan është çmenduri, se po të pyesësh shqiptarët ne mendojmë se ishim të parët mbas majmunit. Po të pyesësh grekët ata mendojnë se Holanda është një fshat i vjetër i Greqisë së lashtë, ata mendojnë se janë dhe para majmunëve. Po të pyesësh serbët duhet të lëvizësh sepse edhe mund të vritesh. Po të na pyesësh ne Napoleoni është shqiptar. Pra këto gjëra nuk duhet të merresh në nivel Europian. Gjëja më e pakuptueshme përtej kësaj është se as ne as MV nuk po trokasim në derën e BE për tu bërë anëtarë”- tha Rama.
