Gjyqtarët dhe prokurorët e ngelur në veting po vijojnë të shijojnë të qetë pasuritë. Janë mbi 200 emra që kanë ngelur dhe shumica për mosjustifikim të pasurisë, por përveç disa anëtarëve të Gjykatës Kushtetuese dhe Gjykatës së Lartë, nuk ka pasur hetime për emra të tjerë.
Bashkimi Europian e ka vënë kusht hetimin e të ngelurve në veting, por duket se drejtësia nuk po lëviz. Kreu i Prokurorisë së Posaçme, Arben Kraja, ka dhënë sot sqarime në Këshillin e Integrimit Europian, të mbajtur në ambientet e Kuvendit. Ai tha se SPAK ka nisur procedimin penal për disa ish-anëtarë të Gjykatës së Lartë dhe Kushtetuese, por nuk mund të hetojë gjyqtarët e rretheve.
Sipas tij, SPAK nuk ka kompetencë që të nisë kryesisht hetimet për ta dhe e kaloi topin te organet e rivlerësimit. Sipas Krajës, deri më sot Komisioni i Pavarur i Kualifikimit dhe Inspektorati i Lartë i Deklarimit dhe Kontrollit të Pasurive nuk kanë bërë asnjë kallëzim penal për fshehje pasurie nga gjyqtarët apo prokurorët e ngelur në veting.
“Bazuar në nenin 75 të Kodit të Procedurës penale SPAK mund të hetojë anëtarë e Gjykatës Kushtetues, Gjykatës së Lartë dhe Prokurorin e Përgjithshëm. Organet e rivlerësimit kalimtar nuk kanë paraqitur asnjë kallëzim penal. Asnjë institucion i deklarimit të pasurive nuk ka paraqitur asnjë kallëzim penal pranë prokurorisë”, tha ai.
Edhe pse prej disa vitesh në çdo raport të BE theksohet se vetingu nuk mund të ndalet me kaq, organet përgjegjëse nuk kanë bërë asnjë referim.
Teksa KPK edhe justifikohet sepse ligji i vetingut shprehet se qëllimi i rivlerësimit nuk është ndjekja penale, kjo nuk vlen për ILDKP. Ky organ ka detyrimin që në çdo rast që ka dijeni për fshehje pasurie të vërë në dijeni organet e drejtësisë.
Ka pasur me dhjetra raste kur ILDKP i ka nxjerrë të pastër njerëzit e drejtësisë, por KPK ka zbuluar fshehje pronash. Shumë gjyqtarë dhe prokurorë kanë kryer dhe evazion fiskal, pastrim parash apo dhe krime të tjera. Por deri më sot nuk ka asnjë lëvizje nga drejtësia.
Duket se tashmë hetimi i tyre është kthyer në ping pong mes institucioneve. SPAK shprehet se nuk ka kompetencë dhe ju takon ILDKP-së dhe KPK-së të bëjnë kallëzime. Këto të fundit nga ana e tyre kapen te ligji i vetingut dhe duket se të fituar dalin ata që kanë vjedhur për 30 vite dhe tashmë e mbyllin karrierën të qetë. /Pamfleti
