Sonte u luajtën disa nga ndeshjet e raundit të 3 të fazës së grupeve të Champions League.
Interi mori 3 pikë ndaj Barcelonës në “San Siro”, pasi triumfoi minimalisht 1-0.Nënkampionët e Italisë e nisën “zjarr” takimin, teksa Çalhanoglu provoi të befasonte me një goditje nga distanca portierin e katalanasve, Ter Shtegen.
Pak më pas, ekipi i Inzaghit pretendoi për penallti pas një prekje me dorë të Erik Garsias. Gjyqtari mori sinjal nga VAR-i që ta shikonte edhe një herë rastin, me kryesorin Vinçiç që nuk ndërroi mendje. Kontestimet ishin të shumta, por në fund rezultuan të kota.
Italianët morën avantazhin me Korrean, por goli u anulua për pozicion jashtë loje. Në fund pikërisht Çalhanoglu “tundi rrjetën” me një goditje nga larg.
Ekipi i Çavit rriti presionin dhe gjeti shtyllën sapo fillon e dyta, me Dembele. Katalanasit barazuan me Pedri në minutën e 67, por goli u anulua nga VAR-i
Vendasit ruajtën avantazhin deri në fund, duke u renditur në vendin e dytë me 6 pikë, 3 më shumë se Barça e vendit të 3.
Napoli ka mposhtur me shifrat 1-6 Ajaksin në Holandë. Të parët që realizuan ishin vendasit me Kudus, por të besuarit e Spaletit përmbysën shifrat duke gjetur rrugën e rrjetës me Raspadorin, Di Lorencon dhe Zielinskin në pjesën e parë. Në pjesën e dytë, italianët vazhduan të shënonin, këtë herë me Kvaratskhelia, Simeone dhe Raspadori.
Liverpuli bëri detyrën, duke mposhtur me rezultatin e pastër 2-0 Gllasgou Renxhgërs, me golat e Arnold dhe Salah nga pika e bardhë e penalltisë.
Befasia e madhe erdhi nga Belgjika, ku Atletiko e Madridit u dorëzua ndaj Klub Bryzhit, teksa skuadra belge triumfoi 2-0 në shtëpinë e tyre.