Partia Demokratike ka hedhur akuza të forta në drejtim të qeverisë për rritjen e çmimit të energjisë për biznesin e madh e cila sipas saj do të ketë lidhje drejtpërdrejt me xhepat e qytetarëve.
Sekretari i Grupit Parlamentar të PD, Arbi Agalliu në një deklaratë për mediat thekson se kriza energjitike në Shqipëri nuk vjen si pasojë e tregut global por “themelet i ka nga korrupsioni në qeveri”.
Deklarata e Partisë Demokratike:
Përshendetje të nderuar qytetarë!
Sot dëgjuam se si qeveria i faturon tregjeve ndërkombëtare krizën të cilën e artikulon përdite. Por në të vërtetë problemi është tjetërkund.
Kjo është një krizë korrupsioni, kjo krizë i ka themelet në abuzimin e tenderave me miliona euro që zhvillon OSSHE.
Kjo krizë buron nga punësimi në administratën publike dhe në OSSHE të qindra patronazhistëve që paguhen nga taksat e shqiptarëve. Kjo krizë e ka themelin në abuzimin dhe vjedhjen që bëhet në këtë sektor.
Ne nuk kemi asnjë investim real në sektorin e energjisë në Shqipëri.
Dëgjuam qeverinë sot se si tha që nuk do të rritet çmimi i energjisë elektrike për konsumatorin dhe për biznesin e vogël, por në asnjë moment nuk dëgjuam se çfarë do te ndodhë me çmimin e energjisë elektrike për biznesin e madh.
Është e pashmangshme nëse do të kemi rritje të çmimit të energjisë elektrike për këte sektor të mos preket qytetari shqiptar.
Njerëzit , qytetarët, konsumatorët,, blejnë produkte dhe shërbime që ofrohen nga biznesi i madh dhe në këtë kontekst xhepi i çdo shqiptari do të rëndohet në mënyrë të pashmangshme.
Të nderuar qytetarë! Kriza nuk vjen nga rritja e çmimit të tregjeve ndërkombëtare. Kriza i ka themelet pikërisht në abuzimet dhe në korrupsionin që kjo qeveri bën.
Ju faleminderit!
