4.3 ton kokainë janë sekuestruar gjatë një megaoperacioni nga njësia e Policisë Ekonomike dhe Financiare e Policisë së Triestes e koordinuar nga Drejtoria Antimafia në Itali.
Mediat italiane raportojnë se janë duke u kryer hetimet paraprake, ndërsa janë lëshuar 38 urdhër arreste për persona mes Evropës dhe Kolumbisë. Konkretisht masat e arrestit janë në Itali, Slloveni, Kroaci, Bullgari, Holandë dhe Kolumbi, të gjithë të akuzuar për trafik ndërkombëtar droge. Mes tyre ka agjentë, tregtarë me shumicë dhe transportues droge.
Gjithashtu janë sekuestruarrreth 2 milionë euro para kash. Ky është një ndër konfiskimet më të mëdha të drogës në Europë. Operacioni është në vijim.
Për 4300 kilogramët kokainë të sekuestruara janë paguar për 96 milionë euro nga grupet kriminale dhe janë rishitur në tregun italian për të paktën 240 milionë euro. Mega-operacioni i ka dhënë një goditje organizatës së fuqishme kriminale të “Klanit del Golfo” , më i rëndësishmi në mesin e narkotikëve kolumbianë.
Sekuestrimi i drogës u realizua në një vit hetime, nga 19 dërgesa kokaine të kontrolluara që nga maji i vitit 2021 deri në majin e vitit 2022. Clan del Golfo është i lidhur edhe me Shqipërinë pasi është kapur duke shpërndarë kokainë për trafikantët shqiptarë. Një nga rastet që u zbulua lidhja me shqiptarët ishte kur u kap kontejneri me banane i Arbër Çekajt, ku ishin të fshehur 613 kg kokainë. Kjo sasi kokaine, e vlerësuar në tregun kolumbian 37 milionë dollarë, ndërsa në atë evropian 180 milionë dollarë, i përkiste grupit të armatosur “Clan del Golfo” që furnizoi trafikantin shqiptar.
