Bashkimi Evropian duhet të zhvillojë urgjentisht një vizion të ri për Ballkanin Perëndimor dhe të ketë zgjerimin ndër prioritetet e tij, ka deklaruar kryeministrja italiane Giorgia Meloni.
Meloni gjatë një konference në Trieste të titulluar “Italia dhe Ballkani Perëndimor”, e cila u organizua nga Ministria e Jashtme me iniciativën e Ministrit të Jashtëm dhe zëvendëskryeministrit Antonio Tajani.
Konferenca është pjesë e programit të qeverisë për të përshpejtuar procesin e anëtarësimit të vendeve të Ballkanit Perëndimor dhe për të sjellë më shumë Italinë në rajon përmes investimeve në “sektorët strategjikë”.
“Ishte i rëndësishëm rikonfirmimi i angazhimit të Bashkimit Evropian gjatë takimit të mbajtur në 6 dhjetor në Tiranë për të mbështetur rajonin me masa konkrete. Megjithatë, ne nuk mund të ndalemi vetëm në masat ekonomike. Është urgjente që Bashkimi Evropian të zhvillojë një vizion të ri ndaj këtij rajoni dhe të vendosë zgjerimin në Ballkanin Perëndimor ndër prioritetet e tij.”, theksoi Meloni.
Ndërsa Tajani shpjegoi se qeveria e Italisë synon të inkurajojë investimet e kompanive italiane në Ballkanin Perëndimor për të mos u lënë hapësirë vendeve të tjera që mund të përfitojnë nga mundësia e rritjes ekonomike.
“Nëse jemi politikisht të pranishëm, me kompanitë tona dhe gjithashtu me trupat tona paqeruajtëse, nuk ka rrezik që të tjerët të pushtojnë hapësirën. Nuk është vetëm Rusia, shumë janë të interesuar për Ballkanin. Prandaj Italia dhe Europa duhet të jenë më të pranishme”, tha Tajani.
Ndërsa për ambasadorin e Italisë në vendin tonë Fabricio Bucci, Shqipëria është porta e Ballkanit.
“Qeveria shqiptare dëshiron ta bëjë Shqipërinë një Singapor të Ballkanit. Ajo dëshiron të kalojë nga call center-at në qendrat dixhitale me investime të mëdha në sferën dixhitale. Shqipëria përfaqëson urën për depërtimin e sistemit tonë në të gjithë Ballkanin”.
I pranishëm në konferencë ishte edhe Komisioneri për Zgjerimin e BE-së, Oliver Varhely, që përsëriti nevojën e një Ballkani Perëndimor më të sigurt për të gjithë Evropën.
