Kryeministri Rama ndodhet sot në Romë për tu takuar me Ministrin e Jashtëm të Italisë, Luigi Di Maio, me të cilin do të diskutohet për organizimin e Konferencës së Donatorëve që do të mbahet me datë 17 shkurt në Bruksel. Ata do ti bashkohen një tryeze diskutimesh me të tjerë të pranishëm, në Palazzo della Farnesina, në Romë.
Në takimin e sotëm të organizuar në formë dreke, pritet që të pranishmit të diskutojnë në lidhje me detajet për organizimin e Konferencës së Donatorëve e cila ka në fokus mbledhjen e donacioneve për rindërtimin pas tërmetit të 26 nëntorit.
Kujtojmë se një muaj më parë, Ministri i Jashtëm italian Luigi Di Maio mbërriti në kampin e Vorës ku shprehu gatishmërinë e tij për të ndihmuar Shqipërinë në ato ditë të vështira.
“Prania ime sot këtu përbën një dëshmi të afërsisë së qeverisë italiane me popullin shqiptar pas tërmetit të fundit të muajit të kaluar. Afërsia e qeverisë italiane është dëshmuar edhe nëpërmjet pranisë së emergjencave civile edhe forcave zjarrfikëse. Këtë e dëshmon edhe ky kamp me tenda që është dhuruar nga qeveria italiane”, tha atëherë, di Maio.
