Detaje të reja janë zbuluar nga plagosja e 22-vjeçarit Redi Balla mbrëmjen e djeshme në kryeqytet. Ngjarja ndodhi në zonën e Komunës së Parisit, dhe për të ka folur vetë i riu i plagosur.
I plagosur mbrëmjen e së martës tek “Komuna e Parisit”, Balla ka deklaruar para hetuesve se nuk e ka parë agresorin në fytyrë dhe nuk e dinte kush është. Ai ka deklaruar se është qëlluar ndërkohë që ishte në makinë dhe nuk e kishte mendjen.
Deklarimet e tij nuk kanë ndihmuar hetuesit për identifikimin e autorëve. Po punohet me kamerat e sigurisë përreth për të zbardhur lëvizjet e tyre.
“Po shkoja në shtëpi. Parkova makinën dhe po merresha me celularin. Dikush m’u afrua dhe më qëlloi. Nuk e pashë autorin, se mbulova kokën me duar,” thotë ai.
Balla i cili mori një plumb në këmbë, gjatë natës iu nënshtrua një ndërhyrje kirurgjikale. Policia po punon për zbardhjen e ngjarjes dhe kapjen e autorit.
