Gjykata Administrative ka ndaluar avokatët të mbajnë celularët në sallën e gjyqit.
Në vendimin e datës 1 qershor thuhet se avokatët, gazetarët, por edhe të pranishmit në seancë, duhet të dorëzojnë celularët para se të hyjnë në gjyq dhe nëse nuk i binden këtij urdhri, do u ndalohet hyrja në sallë.
Rregullat e reja janë konsideruar absurde nga Dhoma e Avokatisë, të cilët janë “ankuar” pranë Këshillit të Lartë Gjyqësor, duke paralajmëruar se nëse ky urdhër nuk hiqet, atëherë do të ngrihet padi.
Sipas avokatit Jordan Daci, urdhri është një zhgarravinë e Gjykatës Administrative që ndalon avokatët nga përdorimi i mjeteve të punës.
“Ky është urdhri zhargavinë i Gjykatës Administrative Tiranë që ndalon avokatët nga përdorimi i mjeteve të punës sikurse janë edhe telefonat e zgjuar ose smart siç e thonë këto që dinë anglishten, por jo siç duhet shqipen. Sot unë dhe shume koleg përdorim aplikacione mobile për kalendarin dhe shumë sisteme të tjera ndihmese të teknologjisë si mjete ndihmëse për punën. Në një gjykatë ku gjykohen çdo dite pavleshmëritë dhe paligjshmëritë e akteve administrative, vete gjykata bën aktin me flagrant absolutisht të pavlefshëm dhe kufizon të drejtat dhe liritë themelore të njeriut me akte zhgarravina jo në përputhje jo me ligj dhe as me Kushtetutën e RSH duke cenuar lirinë e ushtrimit të profesionit të avokatit, por jo vetëm, në kufijtë e shkeljes së rëndë administrative e deri në shpërdorim detyre. Gjithë bota shkon drejt teknologjisë gjykatat tona kthehen mbrapa tek zhgarravinat e letrave te bakallit. Në ditët në vijim do kërkohet revokimi dhe nëse nuk pranohet do bëhet padi duke përfshirë angazhimin e Dhomës së Avokatëve të Shqipërisë, nga e cila sapo m’u konfirmua që i është komunikuar KLGJ-se ky shqetësim. Ky rast tregon që në vendin tonë duhet të protestosh çdo sekondë të jetës, të bësh padi e ankesa çdo dite dhe prapë nuk do mjaftonin që të zgjidheshin problemet e shëmtuari si ky… Çdo koleg është i ftuar t’i bashkohet nismës për të kundërshtuar këtë akt që njofton që akte të ngjashme dhe më të renda do dalin ne vijim”, shkruan Daci.
Vlen të theksohet se, urdhri vjen në një kohë kur avokatët prej ditësh janë ngritur në protesta për një tjetër problematike, hartën e re gjyqësore, e cila shkurton numrin e gjykatave nga 22 në 13 gjykata të shkallës së parë, 1 Apel nga 6 që kanë qenë dhe 2 Gjykata Administrative.
