Ish-kreu i Shërbimit Informativ Shtetëror, Fatos Klosi, ka replikuar ashpër me gazetarin Basir Çollaku, teksa ka komentuar zhvillimet e fundit politike në emisionin “360 Gradë”. Klosi ka sulmuar kryedemokratin Lulzim Basha, lidhur me deklaratën e këtij të fundit se sonte do të arrestohet kryebashkiaku i Durrësit, Vangjush Dako.
Lidhur me këtë, i është përgjigur ashpër gazetari Çollaku, i cili i ka thënë ish-kreut të SHISH se ka bërë atë që nuk duhej bërë, duke u përfshirë në fushatë elektorale.
Pjesë nga diskutimet:
Klosi: Dëgjova kryetarin e PD që tha do ta arrestojnë. Nuk është hera e parë. Më duket e paarsyeshme që një kryetar partie del dhe thotë çfarë po bën prokuroria. Nëse ai do të arrestohet sot, nesër do ta japin të gjithë agjencitë e lajmeve që është arrestuar. Mos na bëj lojëra këtu.
Çollaku: Ti je përfshirë vetë në fushatë elektorale. Ke arkivin tënd. Ke bërë atë që nuk duhej bërë.
Klosi: Je i vogël fare të më gjykosh ti mua. Je i profesionalist në disa gjëra të vogla. Ti mbahesh në biseda televizive si ekspert i madh.
Çollaku: Kam qenë në KQZ bashkëkryetar me atë tuajin. E kupton që po flet broçkulla. Shefi i Shërbimit në asnjë vend në planet nuk del për të bërë temena nëpër emisione. Në 25 vjet nuk duhet të flasë. Ka qenë në një detyrë të rëndësishme shtetërore.
Klosi: Me këtë gjuhë nuk më tremb. As shefat e tu nuk më trembin.