Jo vetëm plusvalenca! Hetimi “Prisma” që përfshin Juventusin vazhdon të zgjerohet, duke kaluar edhe te pjesa e menaxherëve të futbollistëve. Siç raporton “Gazzetta dello Sport”, hetuesit po punojnë edhe mbi “punët e bëra nga disa agjentë të përfshirë në disa ndërmjetësime të akordeve të ndryshme”, siç lexohet në komunikatën zyrtare të ditës së premte, të Prokurorisë së Torinos.
Kjo do të thotë se Juventusi mund të ketë lëshuar edhe disa mandate të rreme, për disa operacione. Sipas akuzës dhe përgjimeve të bëra, ka dyshime të mëdha se disa menaxherë janë paguar edhe për disa operacione merkatoje inekzistente dhe mbi të gjitha që Juventusi ka përdorur mediatorë apo menaxherë “të besuar” për këto lëvizje.
Mes menaxherëve në librin e pagës së bardhezinjve spikasin emrat e Zhorzh Mendeshit dhe Mino Raiolës. I përfshirë edhe Kristiano Ronaldo, i cili citohet në dekretin e mësymjes për një “letër private, e cila nuk duhet të dalë”, ku sqarohen raportet ekonomike mes Juventusit dhe ish-sulmuesit portugez, të cilin “Guardia di Finanza” ka marrë si detyrë nga Prokuroria e Torinos për ta kërkuar dhe për ta rikuperuar, pas kontrolleve në selinë bardhezi.
Mino Raiola, ndërkohë, që vetëm për operacionin e transferimit të Matajs de Ligtit nga Ajaksi te Juventusi, ka futur në xhep 10.5 milionë euro si “ndere strukturore”, ka përfunduar mbi lupën e hetuesve, sidomos për transferimin e Franko Tongias, i përfshirë në një operacion shkëmbimi me klubin francez të Marsejës, të cilin Prokuroria e quan “transferim pasqyrë”, duke qenë se nuk ka pasur asnjë lëvizje parash mbi tratativën në fjalë.
Juventusi nga ana e tij, i cili të dielën është shprehur se është i hapur për të vënë në dispozicion të prokurorisë dhe shtetit çdo lloj faktesh për hetimin, nuk dihet se sa i qetë mund të jetë në vazhdim, duke parë se hetimi në fjalë po thellohet dita-ditës.
Kërcënon Codacons
Lidhur me reagimet e vazhdueshme ndaj hetimit të hapur kundër klubit bardhezi, Marko Donzeli, njëri prej presidentëve të CODACONS (Koordinatorja e shoqatave për mbrojtjen e ambientit dhe të drejtave të konsumatorëve), ka kërkuar zyrtarisht dje me anë të një letre zyrtare, zbritjen e Juventusit në Serinë B dhe heqjen e titujve kampion të fituar në vitet e plusvalencave fiktive, në rast se krimi ekonomik konfirmohet me fakte.
Operacioni nën vëzhgim prek shumën totale prej 282 milion eurosh, me të cilat janë fryrë bilancet e skuadrës bardhezi, pas lëvizjes së parave të hetuara nga fundbuxheti në vitet 2019-2021.
Ai që ka vënë fytyrën, ka qenë Marko Donzeli, i cili ka komentuar:
“Po flasim për një akuzë shumë të rëndë, dhe Juventusi, i cili ka dominuar në Itali në vitet e fundit, gjithmonë, nëse krimi konfirmon se bardhezinjtë janë avantazhuar në mënyrë të paligjshme kundrejt klubeve të tjera kundërshtare, atëherë kjo gjë ka falsuar kampionatet e mëparshme të futbollit, përfshirë këtu edhe fitimin e titujve kampionë të Juventusit.
Prandaj, në mbrojtje të tifozëve të futbollit, kemi vendosur të prezantojmë një kërkesë në zyrat e ‘Antitrust’ (Shoqata legjislative për mbrojtjen kundër monopoleve), duke kërkuar zbritjen në Serinë B të Juventusit, por në të njëjtën kohë edhe anulimin e titujve të fituar, për periudhën e hetimit, falë lëvizjeve joligjore të shumave të parave”./Panorama Sport
