Pas disa ditësh, do ta shohim avokat/ Me dorëheqjen e këtij pazarxhiu, drejtësia shpëtoi edhe nga një gjyqtar tjetër i strukturës së vjetër mafioze; por KLGJ, ILD e SPAK, nuk duhet të lejojnë që ky gjyqtar, duke ikur nga detyra, të shpëtojë pasuritë e vëna me vjedhje të tokave publike dhe me shpërdorim detyre në favor të botës së krimit e korrupsionit
Sot, datë 18 qershor, ora 10:30, Kryetari i Gjykatës së Kavajës, “plepisti” Luan Lusha, duhej të ishte paraqitur në seancën e “Veting”, por Komisioni i Pavarur i Kualifikimit, ka njoftuar se ai ka dhënë dorëheqjen para dy ditësh.
Nuk ka paraqitur arsye familjare apo shëndetësore, por e ka tmerruar dosja e mbushur me zullume pasurore e abuzime të rënda gjatë ushtrimit të detyrës, sidomos me gjyqet në favor të zyrtarëve grabitës të tokave bregdetare e lirimit të trafikantëve.
Në dosjen hetimore të rivlerësimit që ka bërë komisioni i “Veting”-ut, rezulton se 40% e abuzimeve dhe aferave korruptive të këtij gjyqtari janë denoncuar prej 2 vitesh nga “Pamfleti”, mes tyre dhe raporti Nr. 282, datë 10.12.2019 i Këshillit të Lartë Gjyqësor.
Sa për kujtesë, ‘plepisti’ Luan Lusha, është gjyqtari që sipas dosjes së prokurorisë, ka falsifikuar formularët e ndarjes së tokës në Komunën Luz-Kavajë, duke vjedhur 10 mijë e 500 m2 tokë pronë shteti në bregdet, ndërkohë që kishte marrë 12 mijë e 273 m2.
Me milionat që ka siguruar nga korrupsioni gjatë detyrës si gjyqtar e drejtues gjykate në Kavajë, Luan Lusha ka ndërtuar vila, hotele, restorante, 2 zyra avokatie në Durrës-Kavajë dhe ka blerë makina luksi e 8 apartamente në Tiranë, Durrës, Kavajë për vete dhe fëmijët.
Për të fshehur burimin e zi të pasurive që ka grumbulluar, krye-gjyqtari Luan Lusha është bërë aq qesharak, sa ka deklaruar në ILDKP, se resortin “Palma” 3000 m2 buzë detit në Spille-Kavajë e ka ndërtuar me kursime nga paga e djalit 40 mijë lekë si punonjës shteti dhe me pensionin invaliditetit 9900 lekë të nënës së tij.
Ndërsa për 8 apartamentet në Tiranë, Durrës e Kavajë e për 1 vilë në Himarë, gjyqtari Lusha, deklaron se i ka blerë me kursimet nga paga e tij gjatë 15 viteve të fundit dhe nga puna e gruas si shitëse nw tezga gjatë sezonit të plazhit, pa llogaritur 4 lokale nën pallate brenda qytetit të Kavajës.
Llogaritë e bëra, konfirmojnë se dhe sikur Luan Lusha, të mos kishte shpenzuar asnjë qindarkë nga paga për 20 vite si gjyqtar, mund të blinte vetëm 2 apartamente; mirëpo pasuria e tij e luajtshme dhe e paluajtshme ia kalon dhe pasurisë së ‘plepistit’ Gjin Gjoni e ish krye-prokurorit Petrit Fusha.
Kështu e ka deklaruar burimin e financimit, jo vetëm Luan Lusha për efekt “Veting”-u; por edhe djali i tij Emin Lusha në KLGJ në muajin dhjetor 2019, kur kandidoi për gjyqtar si babai, por nuk u emërua, mbasi iu quajtën pasuri nga burime të paligjshme dhe fshehje të tyre.
Vërtet Luan Lusha dha dorëheqjen, por KLGJ, ILD e SPAK, duhet të fillojnë procesin penal si ndaj Adriatik Llallës, që ky gjyqtar pasanik të mos shpëtojë pasuritë e vëna me vjedhje tokash publike dhe shpërdorim detyre, në favor të botës së krimit e korrupsionit./Pamfleti
