Shkruar nga Pamfleti
“Kemi bërë kontrabandë vaksina"/ Rama rrëfen planin e fshehtë me Di Maion: Pfizerin e morëm nga Italia, të përfshira edhe shërbimet sekrete!
“Unë një shqiptaro-italian, me Di Maion një napolitano-shqiptar, kemi bërë bashkë një operacion kontrabande me vaksinat… ku të përfshira kanë qenë shërbimet sekrete” – këto që lexoni nuk janë skenar i ndonjë filmi aksion-spiunazh të James Bond… Kryeministri shqiptar, Edi Rama dhe ministri i Jashtëm italian, Luigi Di Maio pranojnë se kanë kontrabanduar vaksina.
Gjatë fjalës së mbajtur në sallën Aula Magna të Universitetit të Bergamos, në një seminar me titullin “Kultura do të shpëtojë botën”, Rama ka rrëfyer historinë se si arriti të merrte vaksina fshehurazi nga Italia pavarësisht ndalimeve të Pffizer-it.
‘Një operacion kontrabande vaksinash i kryer nga dy ministra’- shkruan Fabio Paravisi për gazetën e njohur italiane ”Corriere della Sera”. Rama i referohej ish-ministrit të Jashtëm, Luigi Di Maio i cili ishte ulur në rreshtin e parë të sallës, duke thënë: “Sot po them diçka që askush nuk e di. Unë jam shqiptaro-italian, Di Maio napolitano-shqiptar, që kemi bërë bashkë një operacion kontrabande. Çfarë italiani apo shqiptari jeni nëse jeni gjithmonë në përputhje me ligjin?”
Pasi foli për situatën politike shqiptare dhe marrëdhënien e tij me Italinë – se si shkuan në gjatë kohës së diktaturës në Vlorë jo për det, por për të ndjekur programet televizive italiane – Rama iu kthye periudhës kur Covid-19 goditi fort Shqipërinë.
“Njerëzit kishin frikë se do të vdisnin si peshku pa ujë, por nuk kishim mundësi të bënim vaksinën. E pyeta Luigin se a mund të na japësh doza të paktën për mjekët dhe infermierët? Pffizer kishte një kontratë shumë të prerë me qeveritë: Unë iu jap vaksinat, por ju nuk mund t’ia jepni ato askujt. Diçka që është gjithçka tjetër veçse e krishterë. Luigi tha se do të ishte një gjë shumë serioze. Por, ne e bëmë këtë me shërbimet tona sekrete: dy ministra që i kalonin mallrat kontrabandë njëri-tjetrit për të shpëtuar njerëzit. Më pas nuk mund t’i fshihnim vaksinat, duhej t’i administronim edhe ato. Avokatët e Pffizer kërcënonin me padi dhe donin të dinin se si i morëm ato, por ne thjesht thoshim nga një vend mik. Thashë se kishim mësuar nga napolitanët se nuk duhet të heqësh dorë kurrë nga një mik para policisë”, tha Rama.
Ai e qetësoi më në fund Di Maion për çdo polemikë duke shtuar “Luigi, tani je njeri i lirë”. Rama e quajti Shqipërinë “një Itali më të ngatërruar”, ndërsa shtoi se nuk mendon se do të ketë probleme me qeverinë e ardhshme italiane.
“Nuk kemi pasur kurrë probleme në të kaluarën me asnjë lloj qeverie, si me të majtën ashtu edhe me të djathtën sepse ne i përkasim së njëjtës histori: Berlusconi do të kishte qenë një socialist i mirë nëse nuk do të kishte qenë tashmë vendi i zënë në atë anë”, tha Rama. Duke folur për zgjedhjet italiane, Rama ka bërë shaka me kryetarin e bashkisë së Bergamos, Giorgio Gori.
“Ai është një nga humbësit më të pabesueshëm në historinë e 30 viteve të fundit. Nuk e di se si keni arritur të humbni, por keni arritur të shkaktoni një humbje siç nuk do ta kishte asnjë kundërshtar”, tha Rama.
Më tej, kreu i qeverisë u shpreh optimist për hyrjen e Shqipërisë në Bashkimin Evropian,,, teksa edhe këtë herë, nuk mund të mungonte metafora e famshme me dasmën dhe nusen.
“Jemi përpjekur shumë herë, por është si të organizojmë një dasmë dhe nusja nuk vjen. Shumë vite diktaturë na kanë bërë vendin më të largët nga Rusia (nuk kemi nevojë të aplikojmë sanksione, e kemi bërë që nga viti 1990) dhe më të afërmit me Evropën dhe SHBA. Ne jemi më pro amerikanë se teksanët. Për BE-në tani jemi më të qetë sepse tashmë ka pasur zgjedhje në vende si Franca dhe Holanda, pasi një ministër para dhe pas zgjedhjeve janë dy njerëz të ndryshëm, qëndrimi është i ndryshëm”, theksoi ai.
Bergamo po i afrohet momentit kur do të bëhet Kryeqyteti i Kulturës në vitin 2023. I ndalur në këtë moment, Di Maio u shpreh se ky: “Është një burim krenarie dhe në këtë moment historik është një mundësi e shkëlqyer për të ndërtuar ura dhe për të zbuluar se në botë jemi më afër se sa mendojmë.”
Ndërkaq, Edi Rama e vlerësoi Bergamon si një realitet spektakolar ku gjithkush duhet të jetë i lumtur të ketë lindur aty.
“Unë kisha dërguar tashmë 30 infermierë atje gjatë pandemisë dhe sot solla personalisht një artist, që jam unë. Bergamo është një realitet spektakolar, ju duhet të ndiheni të lëvduar nga Zoti që ka vendosur të lindni në Bergamo”, përfundoi ai.
