Aktualitet 3 Tetor 2018, 17:06

“Kërcënimi” i Xhafajt/ Si tentoi Alibeaj rrëmbimin e dosjes Fazlliç, skandali që alarmoi ambasadën amerikane

Shkruar nga Pamfleti
“Kërcënimi” i Xhafajt/ Si tentoi Alibeaj rrëmbimin e

Fatmir Xhafaj i ka kujtuar sot Enkelejd Alibeajt kohën e 8 viteve më parë kur drejtonte Ministrinë e Drejtësisë. Asokohe Inspektorët e Ministrisë së Drejtësisë, të urdhëruar nga Alibeaj, hynë me forcë në ambientet e Prokurorisë së Tiranës, për të rrëmbyer dhe shkatërruar dosjen e Damir Fazlliç.

“Koha kur Ministra, firmosnin urdhra drejtuar Prokurorisë dhe bëheshin Zot të çështjes, për të mbuluar paudhësitë e qeverisjes së kohës, nuk ekziston. I kujtojmë z. Alibeaj, megjithë sikletin që mund të ketë patur, se publiku e ka ende të freskët skandalin ligjor të ish-ministrit të Drejtësisë në Prokurorinë e Tiranës, për një dosje që shqetësonte pushtetin e kohës”, thuhet në deklaratë.

Si ndodhi ngjarja:

Ministria e Drejtësisë, nën drejtimin e Enkelejd Alibeajt, pesë vjet më parë, tentoi të hynte me forcë në ambientet e Prokurorisë së Tiranës, për të rrëmbyer dhe shkatërruar dosjen e Damir Fazlliç.  Inspektorët e Ministrisë së Drejtësisë, të urdhëruar nga Alibeaj dhe familja Berisha, tentuan të hynin forcërisht në Prokurorinë e kryeqytetit, ndërsa shumë njerëz të pushtetit rrethuan organin e akuzës. I gjithë shteti u rreshtua kundër prokurorisë dhe në mbrojtje të Fazlliçit. Kryeinspektori i Ministrisë së Drejtësisë, Plator Bilibashi qëndronte tek porta hyrëse jashtë oborrit të institucionit duke mbajtur në duar urdhrin e ministrit të Drejtësisë, Alibeaj, me të cilin kërkohej kontrolli i dosjes së Damir Fazlliç dhe ballafaqimi i saj me regjistrin penal ku shënohen të dhënat (kodet) e çdo dosje penale dhe data e nisjes së procedimit.

Ndërkaq, punonjësit e policisë që kujdeseshin që askush të mos kalonte portën, kishin hequr spaletat e gradave dhe pjesën e uniformës ku shënohet mbiemri i çdo efektivi, me qëllim që të mos identifikoheshin. Situata i ngjante rasteve të jashtëzakonshme kur numri i efektivave të policisë rritet, ndërsa hyrje-daljeve u kushtohet një vëmendje maksimale deri në detaje. Skandali alarmoi ambasadën amerikane. Këtë e dëshmuan kabllogramet e zbardhura nga Uikiliks. Emri biznesmenit Damir Fazlliç përmendet në të paktën 14 kabllograme të ambasadës amerikane, përfshi tentativat e kryeministrit Berisha për ta shpëtuar boshnjakun nga hetimet e Prokurorisë.

Problematika trajtohej në kabllogramin e datës 14 Tetor 2008 me titull: “Berisha fillon sulmin e ri ndaj Prokurores së Përgjithshme”.

“Duke nisur nga data 10 Tetor dhe gjatë fundjavës, kryeministri dhe Ministria e Drejtësisë nisën një fushatë të re për të intimiduar dhe minuar punën e Prokurorisë së Përgjithshme me pretendimin se prokuroria ka thyer ligjin duke tentuar të marrë në pyetje biznesmenin boshnjak, Damir Fazlliç. Ministria e Drejtësisë tentoi të sekuestrojë dosjen hetimore për Fazlliç dhe më pas po kjo ministri kërcënoi se do të ngrinte akuza për prokurorët në hetimin e Fazlliç. Por zoti Berisha, në një konferencë shtypi mohoi kategorikisht se ka tendencë për të ndërhyrë në punën e Prokurorisë së Përgjithshme”, thuhej në kabllogram.

 

Aktualitet Alibeaj Fazlliç Skandali