Kronike 7 Shkurt 2023, 11:41

Kërkuan 5 mijë euro për të shitur fëmijën e tyre, arrestohen dy prindërit në Durrës

Shkruar nga Pamfleti
Kërkuan 5 mijë euro për të shitur fëmijën e tyre,

Policia e Durrësit ka arrestuar Emre Nuredinin, i cili bashkë me bashkëshorten kishte nxjerrë në shitje foshnjën e tyre ende pa lindur për 5 mijë euro. Rasti i rëndë u bë publik dje në emisionin “Fiks Fare”. Ndërkaq sot policia njofton se ka lënë në burg 27-vjeçarin ndërsa nëna Xhina Hysenaj është proceduar në gjendje të lirë.

“Specialistët për Hetimin e Trafiqeve të Paligjshme, të DVP Durrës, arrestuan në flagrancë shtetasin E. N., 27 vjeç, banues në Durrës, si dhe referuan materialet në Prokurori, për shtetasen Xh. H., 25 vjeçe, për të cilën ka nisur procedimi penal në gjendje të lirë.

Mbrëmjen e djeshme, këta dy shtetas janë shfaqur në një video të transmetuar gjatë emisionit investigativ “Fiks Fare”, duke biseduar me një shtetas tjetër (i infiltruar nga stafi i këtij emisioni), për të shitur foshnjën që mbante në bark bashkëshortja shtatzënë (shtetasja Xh. H.), kundrejt shumës 5000 euro.

Materialet hetimore i kaluan Prokurorisë pranë Gjykatës së Rrethit Gjyqësor Durrës, për veprën penale “Trafikimi i të miturve”, mbetur në tentativë, dhe vijon puna hetimore për dokumentimin e plotë të këtij rasti.

Policia e Durrësit falënderon mediat që denoncojnë rastet e paligjshmërisë dhe i fton që të bashkëpunojnë me strukturat e Policisë, për vënien përpara përgjegjësisë ligjore të autorëve të rasteve të paligjshmërive që ata ndeshin gjatë punës së tyre.”

Kronike Skandali në Durrës