Aktualitet18 Maj 2022, 11:34

Koha kur amerikanët dhe FBI gjetën “gjurmë ruse” në aksionin e Sali Berishës dhe Ilir Metës

Shkruar nga Pamfleti
Koha kur amerikanët dhe FBI gjetën “gjurmë ruse”

Koha kur amerikanët dhe FBI gjetën “gjurmë ruse” në aksionin e Sali Berishës dhe Ilir Metës

Ajo ç’ka është folur e që ka dalë në publik, lidhur me vendimin amerikan për ‘non grata’ është vetëm maja e ajzbergut, ndaj dhe Berisha vetë i druhet një përballjeje personale me faktet, e po kërkon një çadër politike, së bashku me Ilir Metën…

Shkrimi i gazetës më të madhe austriake për Ilir Metën, përveç problemeve me origjinën e parave, ka edhe të dhëna të dyshimta të rrugës së tyre. Që sipas të gjitha gjasave do të plotësohet më shumë në ditët që vijnë, e në këtë aspekt, bëhet fjalë për lidhjet ruse të përplasjes së dyshes së vjetër politike në Shqipëri me SHBA dhe Bashkimin Europian.

Për këtë është folur disa herë, por ka pasur disa zhvillime ku pikëtakimet e interesave të Moskës në Ballkan janë puqur me ato të Sali Berishës dhe Ilir Metës.

Rasti i parë ka qenë natyrisht ajo e shkatërrimit të municioneve e armëve kimike të Bashar al Asadit në Shqipëri në vitin 2013, ku Ilir Meta dhe Sali Berisha ju kundërvunë më fort projektit të qeverisë së SHBA, duke zbythur edhe Edi Ramën e trembur se po humbte pushtetin në nisje të rrugës së tij.

Rasti i dytë ka qenë në vitin 2017, ku aksioni për të bllokuar zgjedhjet parlamentare të qershorit të atij viti, me anë të çadrës në bulevard, “rastisi” me trazirat e Nikolla Gruevskit në Shkup, në momentin kur paramilitarët e tij masakruan Zoran Zaevin dhe Zijadin Selën.

E rasti i tretë është pikërisht vera e vitit 2019, kur me një aksion të përbashkët opozita PD-LSI dogji mandatet parlamentare dhe bllokoi zgjedhjet vendore të 30 qershorit, nga ku doli edhe dekreti i Ilir Metës për të anuluar zgjedhjet e paracaktuara.

Ka qenë një oficer i lartë i FBI-së amerikane, Mark Rossini, i cili foli hapur në atë kohë për lidhjet e Sali Berishës me interesat ruse.

Rossini, një ekspert sigurie dhe analist, foli në fillim në twitter-in e tij e më pas në mediat shqiptare.

Rossini deklaroi atëherë se “Interesi që ka Rusia në Ballkan, e sidomos në Shqipëri që mbetet një vend me shumë mundësi, dhe i jep dalje edhe te porti i vetëm në Adriatik. Nuk e kam thënë unë atë. E ka thënë Departamenti im i Shtetit që në vitin 1998. Ishte pjesë e strategjisë sonë të kufizimit të ndikimit rus. Pra interesi i atyre në Ballkan është se s’kanë ndikim aty, përveçse me Serbinë, që s’ka dalje në det. Nuk ka ndikim në Greqi. Nuk ka në Slloveni. Po përpiqet në Mal të Zi, por nuk ka. Çfarë ka mbetur? S’ka as në Kroaci. Çfarë ka mbetur? Ku mund të mbillet kaos? Cila është gati për ta marrë? Shqipëria”, tha Rossini, i cili akuzoi drejtpërdrejt ish-kryeministrin e vendit, Sali Berisha se me anë të protestave të dhunshme kërkon të ndihmojë agjendën ruse.

E kjo dosje që natyrisht vinte nga informacionet e shërbimeve të specializuara është anashkaluar natyrisht edhe në vendimin për shpallje ‘Non Grata’ të Sali Berishës. Për të cilin autoritete të larta të SHBA kanë deklaruar se burime për ta plotësuar atë kanë qenë natyrisht CIA dhe FBI si dy agjencitë kyçe të sigurisë kombëtare të vendit.

Megjithatë, ajo ç’ka është folur e që ka dalë në publik është vetëm maja e ajzbergut, ndaj dhe Berisha vetë i druhet një përballje personale me faktet, dhe po kërkon një çadër politike, së bashku me Ilir Metën…/Pamfleti

Kryesore #“gjurmë ruse” në aksionin e Sali Berishës dhe Ilir Metës FBI USA