Kanë nisur përplasjet e para mes partnerëve të qeverisë e Avdullah Hoti.
Shefi i grupit parlamentar të LDK-së, Arben Gashi në një konferencë ka akuzuar partnerin qeverisës, Listën Serbe.
Gashi është shprehur se Lista Serbe po sillet si opozitë dhe i ka ftuar ata që të marrin pjesë në seancat e Kuvendit.
Ndërsa nga ana tjetër Igor Simicin nga Lista Serbe, ka thënë se Qeveria nuk po respekton marrëveshjen e koalicionit dhe për këtë arsye me shumë gjasa do ta rrëzojnë Qeverinë Hoti.
“Lista Serbe, përkatësisht deputetët, nuk morën pjesë në punën e kuvendit sot dhe nuk do të marrin pjesë as në të ardhmen, sepse nuk po respektohet marrëveshja e koalicionit të cilën e kemi të nënshkruar. Ne kemi treguar në mënyrë të përsëritur dhe me konstruktivitet angazhimin tonë për të vepruar në përputhje me interesat e të gjithë qytetarëve.
Ne jemi pro interesit të qytetarëve, jemi pro zhvillimit ekonomik dhe pro luftës ndaj pandemisë. Por, paraprakisht duhet të respektohemi si partner qeverisës. Ne e kemi marrëveshjen e nënshkruar në tavolinë dhe kërkojmë që e njëjta të respektohet. Për shkak të qëndrimeve ndaj Listës Serbe ne jemi duke menduar seriozisht largimin nga Qeveria”, ka thënë Simiq.
