Qeveria e Kosovës ditën e djeshme ka vendos masa të reja anti-Covid, kjo ka bërë që kosovarët të nisen drejt Shqipërisë për të kaluar fundjavën. Pas masave të reja kufizuese, shumë shtetas të Kosovës janë nisur drejt Shqipërisë për të kaluar fundjavën. Sipas disa fotografive të publikuara në rrjetet sociale, shihet se në pikën e kalimit kufitar në Morinë tashmë janë krijuar radhë të gjata të makinave.
Dje Qeveria e Kosovës njoftoi se do të mbyllen të gjitha subjektet afariste dhe bizneset, qendrat tregtare e rekreative, supermarketet, subjektet që ofrojnë shërbimet e gastronomisë (restorantet, kafeteritë dhe të ngjashme) në tërë territorin e Republikës së Kosovës prej orës 20:00 datë: 06/11/2020 (e Premte) deri më datë: 09/11/2020 9 (e Hëne) në orën 05:00.
Po ashtu, Qeveria ka vendosur që të fut në karantinë shtatë komuna: Prishtinën, Fushë Kosovën, Gjilanin, Obiliqin, Gjakovën, Podujevën dhe Shtimen.
Në komunat e lartë cekura ndalohet hyrja/dalja e qytetarëve dhe automjeteve private prej orës 20:00 të dt.06/11/2020 deri në orën 05:00 të dt. 09/11/2020.
Kjo ka bërë që edhe kosovarët të nisen drejt Shqipërisë për të kaluar fundjavën.
Ndërkohë qeveria në Shqipëri nuk ka ende një vendim për nisjen e izolimit të dytë, dhe sipas ekspertëve, ka ende kapacitet në spitale, që mund të ofrojnë shërbim për personat e prekur.
