Austria ka mirëpritur kërkesën e Kosovës për anëtarësim në Këshillin e Evropës. Lajmi është bërë me dije nga Ministri i Jashtëm i Austrisë, Alexander Schallenberg, i cili përmes një deklarate thekson se pas agresionit të Rusisë ndaj Ukrainës, “kërkohet një pozicion i ri gjeostrategjik në Evropë”.
Ai ka deklaruar se kjo situatë duhet të shfrytëzohet për të siguruar një model të qëndrueshme jete në Evropë. “Kjo përfshin edhe pranimin e anëtarëve të rinj. Ne mirëpresim dëshirën e Kosovës për t’u bërë pjesë e Këshillit të Evropës”- ka thënë kryediplomati austriak, raporton agjencia e lajmeve APA. Deklarata e Schallenberg ka bërë jehonë në mediet serbe.
Ndërkaq, vlen të theksohet se gjatë ditëve të fundit Serbia ka bërë përpjekje të pareshtura diplomatike për të minuar mundësinë e Kosovës që të bëhet pjesë e kësaj organizate evropiane. Ndërkaq, aplikimi i Kosovës nuk është futur në agjendën e mbledhjes së Komitetit të Ministrave të Këshillit të Evropës të mbajtur në Torino të Italisë.
