Shkruar nga Pamfleti
“Krenari për mua që drejtova Shqipërinë”, Edi Reja në prag të përfundimit të kontratës: Tentojmë fitoren në 2 ndeshjet e radhës
Koha konsiderohet si ilaçi më i mirë i të gjitha problemeve, megjithatë janë disa gjëra që lënë gjurmë dhe që kërkojnë jo vetëm analizë por edhe përgjigje.
E tillë është edhe situata e përfaqësueses sonë, e cila zhgënjeu jo pak me rezultatet e fundit në miqësore, si barazimi 0-0 me Estoninë, por edhe në ndeshjet zyrtare të Ligës së Kombeve, ku barazuam me Islandën dhe u mundëm nga Izraeli.
Tani që kanë kaluar muaj nga ato ndeshje dhe rreth një muaj përpara sprintit final, Edi Reja tregon për “Top Channel” se çfarë analize ka bërë për ato paraqitje.
“Kam analizuar edhe një herë atë që ndodhi në ndeshjet e fundit dhe kam kuptuar që ndodh e njëjta gjë. Lojtarët që vijnë në muajin qershor janë të lodhur e stërlodhur dhe për këtë arsye janë edhe nervoz. Nëse do të kthehesha mbrapa nuk do të bëja një grumbullim aq të gjatë, do t’i thërrisja vetëm një javë përpara ndeshjes”.
Ndërkohë, në merkaton e verës ka bërë zhurmë kalimi i Asllanit nga Empoli tek Interi por edhe rikthimi i Brojës te Çelsi.
“Më vjen shumë mirë, kryesisht për Asllanin që shkoi në një skuadër të madhe si Interi, por tani uroj që të luaj. Sa i përket Brojës, për të është kënaqësi e madhe që kthehet te Çelsi, por duhet të gjejë edhe hapësira për të luajtur. Ai është lojtar që ka të dhëna shumë të mira, por nuk është akoma gati, pasi duhet të aktivizohet 3-4 ndeshje radhazi që të japë rezultate”.
Nga grupi i lojtarëve që trajneri grumbullon shumica e tyre janë me 0 minuta edhe pse kampionatet e tyre kanë filluar.
“Bare është rikuperuar por nuk luajti dot asnjë minutë, e njëjta gjë edhe për Laçin, Strakosha nuk luajti, por janë shumë që nuk luajtën, Manaj po ashtu. Sigurisht që kjo nuk është diçka thelbësore për momentin, pasi deri në shtator do të kenë mundësi të tjera, por një lloj problemi është krijuar. Megjithatë, shpresojmë të gjejnë disa minuta që të jenë në formë optimale, le të jemi pak optimist”, u shpreh trajneri”.
Sa i përket ndeshjeve që na presin, kemi ende shanse për vendin e parë, apo keni tjetër mendim?
“Unë nuk kam frikë asnjërën nga dy skuadrat që do të luajmë, ne, nëse jemi në formë të mirë mund të jemi kompetitiv me të dy kundërshtarët. Gjithsesi, ne duhet të shkojmë atje dhe të tentojmë fitoren se s’kemi alternativë tjetër për objektivin që kemi. Por nëse nuk fitojmë, të shohim që të qendrojmë në vendin e dytë të paktën, që është gjithashtu një pozicion i mirë”.
Këto dy ndeshje janë edhe dy ndeshjet e fundit tuajat, pasi kontrata aktuale mbaron pas tyre, në muajin tetor?
“Unë nuk mendoj asnjëherë të ardhmen, jetoj të tashmen, me presidentin jemi në sintoni edhe me ambientin besoj pavarësisht disa kritikave që kanë ardhur kohët e fundit nga ambienti i gazetarëve, por kjo ndodh gjithmonë. Për mendimin tim kemi bërë punë të mirë deri tani, por analizën e bën Federata. Në grupin tonë për fat nuk zbret askush më poshtë, do të mbetemi në Ligën B, nëse dalim të parët e kalojmë në Ligën A, do të jemi edhe më të kënaqur, por gjithsesi, pavarësisht të gjithave edhe nëse do ta mbyll, për mua ka qenë një eksperiencë shumë e bukur dhe një motiv krenarie që kam drejtuar Shqipërinë”.
