Shkruar nga Pamfleti
Prokurori i përgjithshëm i Gjermanisë është shprehur se ka prova të krimeve të luftës në Ukrainë, në një përmasë të madhe që kalon numrin 3-shifrorë.
Peter Frank i tha gazetës Welt Am Sonntag të vendit se ai pa një nevojë urgjente për një proces gjyqësor në një “nivel ndërkombëtar”.
“Aktualisht, për shembull, ne jemi duke u fokusuar në vrasjet masive në Bucha ose sulmet kundër infrastrukturës civile ukrainase. Deri më tani, prokurorët kanë prova për çështje deri në rangun tre shifror,” tha Frank për gazetën.
Prokurori tha se Gjermania filloi mbledhjen e provave në mars 2022 për të ndjekur penalisht krimet e mundshme të luftës, duke përfshirë intervistimin e refugjatëve ukrainas dhe vlerësimin e informacionit të disponueshëm publikisht, duke shtuar se prokurorët gjermanë nuk po hetonin ende individë të veçantë.
“Ne po përgatitemi për një çështje të mundshme gjyqësore të mëvonshme – qoftë me ne në Gjermani, qoftë me partnerët tanë të huaj, qoftë para një gjykate ndërkombëtare”, shtoi ai.
I pyetur se kush duhet të gjykohet, Frank tha se udhëheqësit e shtetit rus dhe ata që zbatojnë vendimet në nivelin më të lartë ushtarak duhet të mbajnë përgjegjësi.
Ukraina dhe aleatët e saj perëndimorë kanë akuzuar forcat ruse për kryerjen e mizorive në Bucha, një qytet satelit i Kievit, menjëherë pasi nisën pushtimin e tyre shkurtin e kaluar.
Moska e ka mohuar akuzën. Rusia ka shënjestruar gjithashtu infrastrukturën kryesore në Ukrainë, por mohon të ketë shënjestruar qëllimisht civilët.
Ukraina po bën presion për krijimin e një gjykate speciale për të ndjekur penalisht liderët ushtarakë dhe politikë rusë që ajo i konsideron përgjegjës për fillimin e luftës.
