Për ish-Presidentin Bamir Topi, Sali Berisha po shkon drejt krijimit të një partie të re.
I ftuar në “Pikat mbi i”, Topi theksoi se ish-kreut të PD-së i mbeten vetëm dy rrugë për të qenë pjesëmarrës në zgjedhjet e ardhshme; “o do të fillojë një goditje nga brenda për të sulmuar pjesën zyrtare, ose do t’i fitojë sa më shumë masë elektorale brenda partisë për t’u ndarë në parti më vete”.
“Po të shikoni, të gjithë faktorët e rëndësishëm shkojnë te pjesa zyrtare, për momentin, por si do të jetë perspektiva, ajo nuk matet në luftën mes vetit. Këta që kanë frymën, juridikisht nuk kanë asnjë lloj të drejte për të mbajtur kontaktin me KQZ, kështu që kandidatët do të vijnë pikërisht nga ata që kanë rezultatin. Kur vjen puna në përballjen me kundërshtarin real politik, të gjitha të drejtat i ka pjesa zyrtare. Dy janë zgjidhjet, o do të fillojë një goditje nga brenda për të sulmuar pjesën zyrtare, ose do t’i fitojë sa më shumë masë elektorale brenda partisë për t’u ndarë në parti më vete. Do shikoni që do ta ketë betejë intensive. Nuk është më i vetëm siç ka qenë në foltore, por do të jetë i gjithë Komisioni i Rithemelimit. Praktikisht, ai po projekton një strukturë ndoshta të një partie tjetër.”- tha Topi.
Sipas ish-presidentit, 2008-a ka sjellë edhe bipolarizëm në vend.
‘Një nga arkitektët e mjerimit demokratik që përjetojmë është ai që sot kemi kryeministër.’- tha Topi, teksa theksoi se bipolarizmi në një vend që nuk ka bazë apo demokraci, kthehet në autoritet.
‘Ne kemi një koncept të gabuar. Politika është eksperiencë. Por këtu jemi në një terren shqiptar dhe këtu prevalon se kush mund të investojë, kush ka para , kush mund të mbështesë. Unë mendoj që pas një trajektore gati 14 vjeçare, ndoshta për herë të parë klima politike në Shqipëri do të dalë nga bipolarizmi. Një nga arkitektët e mjerimit demokratik që përjetojmë sot është ai që sot kemi kryeministër. Situata është shumë më e thellë se kaq. Rrënjët e thella të asaj që po ndodh në Shqipëri, Në kemi shtet të dobët sepse parlamenti projektohet me njerëz anonim. 2008 nuk projektoi vetëm bipolarizmin, por ngriti kultin e dy kryetarëve. Edhe ai që është në opozitë nuk është pa pushtet. Dalja nga bipolarizmi dhe krijimi i një poli të tre që të jetë një zë për interesa madhore të Shqipërisë.’– tha ai.
