Largimet e deputetëve të LSI kanë ngjallur replika në distancë mes drejtuesve politikë të partive
Nga Gosa e Rrogozhinës, ku zhvilloi një takim me strukturat e PS-së, drejtuesi politik i socialistëve për qarkun e Tiranës, Erion Veliaj, tha se më 25 prill pritet vetëm thellimi i rezultatit të Partisë Socialiste, pasi opozita sipas tij, e ka humbur busullën.
Ai theksoi se të jesh sot me Partinë Demokratike është fyerje, pasi kur demokratët presin prurjet e reja për zgjedhjet e 25 Prillit, shohin që kandidatë për deputetë caktohen emrat që deri më sot janë përdorur si meme nëpër rrjetet sociale.
Veliaj, deklaroi se si PD-ja, ashtu edhe LSI-ja me PDIU-në, e kanë humbur moralin, pasi ngatërrojnë kauzat patriotike me pazare politike.
Kujtojmë se sot Kryetarja e LSI, Monika Kryemadhi akuzoi PS se i është ‘turrur’ deputetëve të saj, për ti marrë në këmbim të vendeve të punës.
“LSI-ja është shpërbërë si kokoshi në një thelë. PD-ja e ka humbur fare busullën. Të jesh sot me PD-në duhet të ndihesh njeriu më i fyer në botë sepse ti si demokrat pret dhe shikon që Fatmir Mediu i Gërdecit caktohet kandidat për deputet apo Nard Ndoka me Dash Shehin. Pra, të jesh sot me PD-në duhet të jesh njeriu më i fyer nga partia jote sepse vendet t’i zënë këta që deri dje bëheshin meme – po kandidojnë të gjitha memet e rrjeteve, karikaturat e Instagramit, kurse demokrati i thjeshtë rri e ngrohet në diell, se ai do e marrë vesh i fundit”, u shpreh Veliaj.
“Ankohen për përmbytjet, por një protestë e PD-së në Tiranë shkatërron më shumë dhe bën më shumë dëme financiare se përmbytja. Një djegie e tyre në Tiranë kushton më shumë se ngrica dhe të gjitha aksidentet që mund të ndodhin prej ngricave. Kur të bie tërmeti në parti, siç i ka rënë LSI-së, kur të zë ngrica dhe të kaplon dimri moral siç ka mbuluar PD-në, dhe kur ngatërron kauzat patriotike me pazaret politike, siç i ka ndodhur PDIU-së, ky po që është problem”, deklaroi Veliaj.
Ai shtoi se PS-ja është e vetmja forcë politike, e cila ka treguar përgjegjshmëri në krye të punëve të vendit. Sipas tij, tërmeti dhe pandemia treguan se qeveria dhe bashkitë ishin të gjitha në këmbë për përballimin e situatës, duke qenë pranë njerëzve në nevojë.
“Njerëzit do të mbajnë mend se kur Partia Socialiste është pushtet, mund të bjerë qameti, pandemia, por vendi ka zot, shteti ka qeveri, qyteti ka kryetar. Kjo është më e rëndësishme. Të binte tërmeti në orën 03:54 të mëngjesit dhe të ishte Luli në krye të shtetit, ai jo vetëm që do ishte në gjumë, por do të kthehej në anën tjetër. Do kishim marrë fund se ai zgjohet në 11:00, si përditë. Por, ama diferencën e bën dikush një ngrihet në këmbë për një minutë, një kryeministër që lëviz çdo gur, njohje personale e politike për të sjellë vaksinën”, tha Veliaj.
