Kosova29 Qershor 2022, 14:14

· Prishtine

Shkruar nga Pamfleti
· Prishtine

Kryeministri i Republikës së Kosovës, Albin Kurti, ka pritur në takim Nënsekretarin e Shtetit për Punë të Jashtme të Italisë, Benedetto Della Vedova.

Duke potencuar marrëdhëniet e shkëlqyeshme bilaterale ndërmjet Kosovës dhe Italisë, Kryeministri Kurti shprehu mirënjohjen për ndihmën dhe përkrahjen e vazhdueshme të Italisë për vendin tonë. Duke vlerësuar Italinë si partner dhe aleat edhe në BE dhe NATO, kryeministri vlerësoi kontributin dhe ndihmën e Italisë për Kosovën, dhënë nëpërmjet Bashkimit Evropian dhe NATO-s.

Ai theksoi vullnetin e Qeverisë së Republikës së Kosovës për rritje të shkëmbimeve tregtare mes dy shteteve dhe gatishmërinë për tërheqje të investimeve në Kosovë.

Nënsekretari italian i Shtetit, falënderoi kryeministrin Kurti për pritjen. Duke biseduar për indikatorët pozitiv ekonomik, të dy u pajtuan se demokracia është mënyra më e mirë për të arritur rritje ekonomike.

Della Vedova përgëzoi Kryeministrin për pozicionimin e qartë të Qeverisë së Republikës së Kosovës dhe vendosjen e sanksioneve ndaj Federatës Ruse.

Në takim u theksua domosdoshmëria e parandalimit të ndikimit rus në rajonin e Ballkanit Perëndimor.

Delegacioni Italian i udhëhequr nga Nënsekretari i Shtetit për Punë të Jashtme, Bendetto Della Vedova, u prit edhe nga zëvendësministri i Punëve të Jashtme dhe Diasporës, Kreshnik Ahmeti.

Takimi u përqendrua në zhvillimin e mëtutjeshëm të raporteve shumë të mira mes të dyja vendeve. Thellimi i bashkëpunimit në fushën e sigurisë dhe mbrojtjes u vlerësua i një rëndësie të madhe, veçanërisht pas agresionit ushtarak të Federatës Ruse në Ukrainë dhe reflektimit të saj në rajonin e Evropës Juglindore.

Prishtine