Nuk dihet, nëse është Taulant Balla ka “gjak të ëmbël dhe i puqen punët e muhabeti” me eksponentët e grupeve kriminale, apo janë këta që i qepen prapa kudo ai shkon, ngaqë e dinë se sigurojnë terren të lirë veprimi, prej fuqisë së tij si mëkëmbës i parë i Bablokut
Laboratori i kokainës në Frakull të Fierit, tregon se kudo ku Taulant Balla çohet si zëri i Edi Ramës dhe drejtues politik i qeverisë e partisë në pushtet, menjëherë hapen magazina e laboratorë përpunimi kokaine, ngrihen ferma droge dhe “rilindin” bandat kriminale.
Nuk është paragjykim, prej koincidencës që laboratori në Frakull u hap pasi Taulanti u dërguar Drejtues Politik në Qarkun e Fierit, por është fakt, që pronari i laboratorit dhe depos së kokainës, ishte Viktor Çervanaku bashkë me djalin, vëllain, nusen e të afërm të tij,.
Ky është një ish- drejtues pushteti lokal i PS, idhtar i Edi Ramës, ish “dora e zezë” e Gramoz Ruçit në atë zonë, ndërsa prej 1 viti ishte bërë i besuari dhe “i forti” i Taulant Ballës në Fier, që i diktonte emërime e goditje brenda PS, aq sa Viktorin e quanin “Naltmadhni”.
Prej 1 viti, gjithë zinxhiri policor në Fier e dinin që shtëpia “Çervanaku” në Frakull ishte kthyer në magazinë e laborator kokaine, por nuk guxuan as ta raportonin, ngaqë Viktor Çervanaku ishte bërë mik i afërt i Taulantit.
P.sh., gjatë viteve që Taulanti ishte drejtues politik në Elbasan, ky qytet u bë bazë e bandave kriminale të PS, të ndara në grupe rivale, por të gjithë krerët kishin miqësi me Taulant Ballën.
Deklarata e Adrian Çapjas dhe vendimi gjyqësor për fshirjen e përgjimeve të Taulantit, janë provë që jo vetëm Taulanti u jepte “porosi” kerëve të grupeve kriminale, por edhe ata, për çdo shqetësim nga policia e prokoruria, i kërkonin garanci paprekshmërie.
Gjatë sundimit të Taulant Ballës në Qarkun e Elbasanit kriminelët bënin emërime drejtorësh e përzgjodhën deputetët. U hap laboratori në Xibrakë; kalonin lirshëm maunet me drogë nga Qafë-Thana në Durrës përmes agjencisë doganore “UJORI” të Qazim Sejdinit;
Vilat, hotelet, lokalet dhe resortet e kriminelëve u kthyen në qendra elektorale të Edi Ramës dhe në baza ahengjesh për militantët, e për rrjedhojë u krijuan magazinat e armëve dhe fermat e drogës në Bradashesh, Labinot, Librazhd, Gramsh, Belsh e Prrenjas, përveç Peqinit e Cërrikut, që Rama ia kishte lënë si zonë autonome Aqif Rakipit.
Sa shkoi Taulanti i deleguar në Fushë-Krujë e Krujë, Nikla dhe Bruzë- Mali u mbushën me drogë; vilat me kokainë, makinat me persona të rrëmbyer dhe u ngjall banda “Rraja”, që në prezencë të Tualant Ballës, rrahën shefin e krimeve brenda komisariatit të policisë.
Edhe në Burrel, kur Taulanti u dërgua nga Edi Rama, për të emëruar kryetar të PS-së ish-gardistin e 21 janarit, gjatë 6 muajve i deleguar atje, shpërthyen atentatet, dinamiti, u mbushën tokat me drogë dhe qarkullonin lirshëm makinat që e transportonin drejt Dibrës e Laçit.
Nuk dihet, nëse është Taulant Balla ka “gjak të ëmbël dhe i puqen punët e muhabeti” me eksponentët e grupeve kriminale, apo janë këta që i qepen prapa kudo ai shkon, ngaqë e dinë se sigurojnë terren të lirë veprimi, prej fuqisë së tij si mëkëmbës i parë i Edi Ramës./Pamfleti
