Kryeministri i Kosovës, Albin Kurti, e ka uruar festën e 28 Nëntorit duke thënë se nevojitet unitet midis dy vendeve, Kosovës dhe Shqipërisë.
Në urimin e tij, Kurti ka thënë se duhet gëzuar për sukseset e secilit shqiptar.
“Urime të gjithëve 28 Nëntori, Dita e Flamurit! Le t’i gëzohemi sukseseve të secilit shqiptar. Le t’i bëhemi krah secilit shqiptar”, ka shkruar Kurti në Facebook.
“Nëntori i Flamurit dhe Forcës. Sot, në Vlorë, në 110-vjetorin e Shpalljes së Pavarësisë së Shqipërisë, kujtuam historinë, përkujtuam sakrificën dhe nderuam lavdinë e atyre që besuan sepse ëndërruan, punuan sepse besuan. Çdo vit, 28 Nëntori na bën bashkë. 28 Nëntori është pikënisja dhe pikëprerja e kombit tonë. E ne duhet të jemi më shpesh bashkë. Të punojmë bashkë. Të rrugëtojmë bashkë. Sepse duam. Sepse duhet”, ka shtuar ai.
Kreu i Qeverisë kosovare më tej ka thënë se një ditë më parë është shënuar edhe dita e Forcës dhe se për Qeverinë e Kosovës ky ishte viti i ushtrisë.
“Me një ndarje buxhetore prej 123 milionë euro, që tejkalon çdo vit paraprak; e me 99% më tepër investime në blerje ushtarake përgjatë këtij viti, ushtria jonë po konsolidohet në aspektin profesional e operacional. Përkrahë aleatëve tanë po kontribuojmë në mbrojtjen e vlerave universale të lirisë, paqes dhe demokracisë. Forca e Sigurisë së Kosovës është forca e pashtershme e brezave të tërë të popullit tonë luftëtarë, të vendosur e të pathyeshëm”, ka shkruar Kurti.
Krerët shtetërorë të Kosovës po qëndrojnë në Shqipëri, për herë të parë në historinë e shtetit, për të festuar bashkë festën me homologët e tyre shqiptarë.
