Kosova29 Nëntor 2022, 13:54

Kurti takon raportuesin special të OKB: Serbia ka kryer krime në Kosovë, hapni arkivat

Shkruar nga Pamfleti
Kurti takon raportuesin special të OKB: Serbia ka kryer krime në

Kurti takon raportuesin special të OKB: Serbia ka kryer krime në Kosovë, hapja e arkivave shtetërore një domosdoshmëri

Kryeministri i Kosovës Albin Kurti ka pritur sot në takim Raportuesin Special të OKB, Fabian Savioli.

Sipas njoftimit të shpërndarë nga Kryeministria, në takim është diskutuar mes të tjerash edhe mbi adresimin e krimeve të kryera gjatë luftës në Kosovë nga ana e qeverisë serbe.

Qeveria njofton se Savioli shprehu mirënjohjen për bashkëpunimin e treguar nga institucionet e Republikës së Kosovës, dhe shprehu solidaritetin me viktimat dhe popullin e Kosovës.

Kryeministri Kurti theksoi përkushtimin e Qeverisë së Kosovës për ballafaqim me të kaluarën dhe për drejtësi.

Ai tha se duhet të ketë rehabilitim dhe rivendosje të drejtësisë për viktimat e të mbijetuarit, pasi është shumë e vështirë për familjet të vazhdojnë të jetojnë normalisht përkundër humbjeve dhe vuajtjeve të tyre.

“Ai veçoi disa nga nismat e Qeverisë së Republikës së Kosovës, si ajo për themelimin e Institutit për krimet e kryera gjatë luftës, hartimin e Strategjisë Kombëtare për Drejtësi Tranzicionale, si dhe fuqizimin e Departamentit të Krimeve të Luftës në Prokurorinë Speciale të Kosovës. Po ashtu foli edhe për ndryshimet e bëra në Kodin e Procedurës Penale të cilat mundësojnë gjykimin në mungesë për raste të krimeve të luftës, duke qenë se shumica e kryerësve të krimeve të luftës në Kosovë ndodhen në Serbi, dhe Serbia refuzon të i dorëzoj ata para drejtësisë”, thuhet në njoftim.

Kurti theksoi çështjen e të zhdukurve me dhunë gjatë luftës dhe familjet që jetojnë në dhembje e ankth, duke mos ditur për fatin e vendndodhjen e të dashurve të tyre. Ai ritheksoi domosdoshmërinë e hapjes së arkivave shtetërore në Serbi, pasi krimet e kryera në Kosovë, ishin krime të kryera nga shteti i Serbisë.

Prishtine #Fabian Savioli #Serbia krime ne Kosove Albin Kurti OKB Takimi

Kosova