Janë mbyllur 7 sfidat e luajtura mbrëmjen e sotme për raundin e parafundit të Ligës së Europës
Lexhia e Ernest Muçit është mposhtur 3-1 nga Lestëri në Angli, duke zbritur në vendin e fundit në renditje në kuotën e 6 pikëve, ndërsa ”dhelprat” marrin vendin e parë në grup me 8 pikë. Sulmuesi shqiptar luajti përgjatë gjithë takimit pa mundur të lërë gjurmë, ndërsa në minutën e 71 u aktivizua dhe Çelhaka nga stoli.
Lioni ka fituar me përmbysje falë dopietës të Çerki dhe Slimanit, duke mposhtur 1-3 rivalët e Brondbit në transfertë. Fitore të rëndësishme ka marrë dhe Monako që ka mposhtur 2-1 në shtëpi Real Sociedadin.
Marash Kumbulla për të dytën ndeshje radhazi luajti si titullar dhe po bind Zhoze Murinjon. Pas sfidës me Xhenoan tani edhe në Conference League, mbrojtësi kuqezi dha prova të rëndësishme se mund të jetë protagonist në skuadrën e Murinjos.
Në “Olimpico” përballë Zorias, verdhekuqtë nuk e diskutuan fitoren, teksa dominuan 4-0 me golat e Perez dhe Zaniolo në pjesën e parë e gjithashtu dygolëshi i Abraham në fraksionin e dytë.
Me këtë sukses, Roma arrin kualifikimin, por jo atë direkt në 1/8 sepse duhet të presë edhe ndeshjet e fundit, për shkak edhe të fitores së Bodo 2-0 me CSKA Sofie.
