Sot afati i fundit për dorëzimin e listave të kandidatëve për deputetë, Yuri Kim i jep mesazhin e fundit Edi Ramës duke e paralajmëruar për pasoja nëse fut të korruptuarit në listë, Babloku merr një listë të zezë, në dilemë për Sadri Abazin dhe shokët e tij. Pas publikimit të listës pritet të plasë sherri në bandën hajdutëve të Rilindjes që kanë vjedhur për 8 vite mbi 8 miliardë euro
Orë dhe minuta dramatike në kampin e Rilindjes, organizatës më famëkeqe të vjedhjes dhe plaçkitjes në Shqipëri. Ditët e fundit, flakët e dy zjarreve që kanë rrethuar Edi Ramën po dalin jashtë kontrollit. Shtetet e Bashkuara të Amerikës, përmes përfaqësueses në Tiranë, Yuri Kim, i dhanë mbrëmë Edi Ramës mesazhin e fundit, duke e paralajmëruar hapur për pasoja nëse do të fusë njerëzit e korrupsionit dhe krimit në listën e kandidatëve për deputetë. Mesazhi u publikua 24 ora para skadimit të afatit për dorëzimin e listave. Në mesazh për herë të parë, Edi Rama paralajmërohet se do të mbajë përgjegjësi personale nëse kthen parlamentin e ardhshëm në strehë për të korruptuarit dhe krahun e krimit, për t’i shpëtuar SPAK-ut, për shkak të imunitetit të deputetit.
“Listat e paraqitura nga partitë nesër do të na tregojnë nëse udhëheqësit e Shqipërisë e kanë kuptuar mesazhin nga SHBA. Ne do t’i bëjmë udhëheqësit e partive të përgjegjshëm”, tha Yuri Kim.
Krahas mesazhit të qartë dhe përvëlues, mësohet se Perëndimi i ka dërguar Edi Ramës edhe një listë të zezë me emrat e njerëzve të krimit dhe korrupsionit madhor, të cilët nuk duhet t’i përfshijë në listë, ndryshe do të mbajë përgjegjësi personale. Ka dyshime të forta se në atë liste është Arben Ahmetaj, Damian Gjiknuri, Ilir Beqja, Sadri Abazi dhe një varg i gjatë me emra të tjerë. Nga ana tjetër, kampi i korrupsionit dhe krimit ka përshkallëzuar mbrëmë presionin ndaj Edi Ramës, me para të pista, oferta për mbledhje votash, kërcënime dhe shantazhe. Nga pasditja e së dielës deri në orët e para të mëngjesit, rreth vilave ku jetojnë njerëzit e kupolës politike të Tiranës kanë lëvizur çanta më para të pista, korrierë që çonin dhe merrnin mesazhe kërcënuese dhe të koduara, që janë kryesisht shoferët e tyre.
Njerëzit e listës së zezë, me të cilët Edi Rama në 8 vjet ka vjedhur mbi 8 miliardë euro sipas hetimeve të Kontrollit të Lartë të Shtetit, po hedhin një pjesë e parave të vjedhura, për të bindur Bablokun t’i përfshirë në listë, në pozicione fituese. Disa burime thonë se pazari ka shkuar deri në 1 milionë euro. Krahas parave, kampi i korrupsionit ka nisur edhe kërcënimet dhe shantazhet ndaj Ramës, duke e paralajmëruar se do të flasin për aferat nëse i përjashton nga lista.
Deputetët, ministrat dhe drejtorët e korruptuar e kanë jetike përfshirjen në listë dhe strehimin në Parlamentin e ardhshëm.
Së pari, duke qenë deputetë, ata janë më pak të rrezikuar nga SPAK-u. Që SPAK t’u vendosë prangat, duhet të marrë leje nga Parlamenti, i cili përbëhet nga ikona të vjedhjes që do mbrojnë njëri-tjetrin.
Së dyti, duke qenë deputetë, ata ndikojnë për të vijuar vjedhjen e buxhetit të shtetit me tendera, përmes kompanive që i kanë kaluar në emër të familjarëve të tyre dhe shokëve.
Ndaj sot do të jetë një ditë vështirë për Edi Ramën, nëse do të ndahet nga korrupsioni apo do të sfidojë Shtetet e Bashkuara të Amerikës. Nga ana tjetër, listat e opozitës po hartohen nga Sali Berisha dhe Ilir Meta, të cilët do t’ua kalojnë sot për t’i firmosur Lulzim Bashës dhe Monika Kryemadhit. Për listën e Metës nuk ka shumë interes, pasi LSI-ja rrezikon të mos marrë asnjë deputet në këto zgjedhje, ndërsa lista e Berishës do monitorohet nga SHBA-BE, ashtu si lista e Ramës./Pamfleti
