Lista/ PD bëhet me dy Kryesi, Berisha shpërblen Topallin, Zhupën, Këlliçin dhe Nokën; lë jashtë Pollon, Imamin dhe Spahon

Partia Demokratike nga dita e sotme do të ketë dy Kryesi. Ish-kryeministri Sali Berisha, ka zgjedhur sot besnikët e tij në Kryesinë e foltores, duke thelluar konfliktin dhe përplasjet në PD.

Edhe pse Gjykata e Apelit nuk ka marrë një vendim për ndryshimet statutore, Berisha ka vijuar me krijimin e organeve paralele. Pasi krijoi Këshillin Kombëtar dhe Kuvendin Kombëtar, sot u ngrit dhe një tjetër Kryesi, paralel me atë që ka pasur PD në kohën e Bashës.

Sot Këshilli Kombëtar i foltores votoi për anëtarët e rinj të Kryesisë. Nga 47 emra, janë zgjedhur 20, ku bie në sy se janë lënë jashtë disa figura që pritej të ishin pjesë.

Sa i takon emrave që ka shpërblyer Berisha për besnikërinë e treguar këto muaj, mund të përmendim Jozefina Topallin. Berisha e riktheu atë sot në PD duke e bërë anëtarë të Kryesisë.

Një emër tjetër është Ina Zhupa, e cila e drodhi duke ikur nga Basha e duke shkuar te Berisha. Ndërkohë Berisha ka shpërblyer foltoristët më të flaktë. Ka futur në kryesi Këlliçin, Nokën, Bylykbashin, Boçin, Shehajn, Baçin, Strazimirin, Mimën, Bumçin dhe Ristanin. Pra ka kthyer të gjithë gardën e vjetër, me të cilën qeverisi para 2013.

Ajo që bie në sy është se jashtë listës janë lënë disa figura që Berisha i afroi së fundmi. Bie në sy Arben Imami, i cili nuk është zgjedhur nga anëtarët. Po ashtu Edmond Spaho është refuzuar. Një tjetër emër është Genc Pollo. Po ashtu kanë mbetur jashtë: Çlirimi Gjata, Floriana Garo, Klevis Balliu dhe Tritan Shehu.

PD me këtë lëvizje do të futet në një tjetër konflikt, pasi kemi dy Kryesi dhe secila merr vendime më vete. Pritet që shumë shpejt të flasë Apeli, i cili nëse rrëzon statutin e foltores, asnjë vendimmarrje e Berishës nuk do të jetë legjitime.

Lista me anëtarët e Kryesisë së Foltores

1. Belind Kelliçi – 192 vota
2. Flamur Noka – 166 vota
3. Oerd Bylykbashi – 148 vota
4. Ervin Minarolli – 137 vota
5. Luçiano Boçi – 128 vota
6. Agron Shehaj – 123 vota
7. Luan Baci – 121 vota
8. Grigels Mucollari – 116 vota
9. Gent Strazimiri – 100 vota
10. Enno Bozdo – 96 vota
11. Keltis Kruja – 91 vota
12. Arben Ristani – 90 vota
13. Aldo Bumci – 89 vota
14. Florion Mima – 88 vota
15. Fatbardha Kadiu 141 vota
16. Jozefina Topalli  – 118 vota
17. Ina Zhupa – 126 vota
18. Edit Harxhi – 85 vota
19. Mimoza Hajdarmataj – 78 vota
20. Eleina Qirici – 75 vota

---

Për të rejat më të fundit behuni pjesë e grupit tonë VIRAL në facebook : PAMFLETI

---