Institucionet shtetërore dhe private të Lituanisë janë goditur nga një sulm kibernetik, i cili u bllokonte aksesin tek shërbimet, ka thënë Qendra Kombëtare e Sigurisë Kibernetike të vendit baltik.
“Ka shumë të ngjarë që sulmet me intensitet të ngjashëm ose më të madh do të vazhdojnë edhe në ditët në vijim, veçanërisht në sektorët e transportit, energjisë dhe financave”- thuhet në një deklaratë të qendrës, raporton skynews.
Sulmi preku edhe rrjetet e sigurta të përdorura nga institucionet shtetërore.
Një grup hakerësh rus të vetëidentifikuar si Killnet kanë marrë përgjegjësinë për sulmin. Qendra Kombëtare e Sigurisë Kibernetike theksoi se sulmi erdhi si kundërpërgjigje ndaj Lituanisë për bllokimin e transferimit të mallrave ruse përmes territorit të saj në enklavën ruse të Kaliningradit.
Kaliningrad është i lidhur me pjesën tjetër të Rusisë me një lidhje hekurudhore përmes Lituanisë. Killnet tha se sulmet do të vazhdojnë nëse kjo nuk ndryshon.
