LSI po organizohet për rikthimin e presidentit në ikje Ilir Meta, në krye të sajë, pas konfirmimit se do të bëhet mbledhja e Konventës Kombëtare, me 25 korrik.
Ish-deputetja e LSI, Silva Caka, është shprehur se Konventa kombëtare do të mbahet me 25 korrik dhe shtoi se kanë nisur riorganizimi i partisë dhe kanë intensifikuar takimet me qytetarët.
“Që nga momenti që ne kemi shpallur edhe datën e Konventës Kombëtare që do të mbahet në 25 korrik, takimet janë intensifikuar, njerëzit janë duke u riorganizuar. Edhe konventa në vetvete ka nevojë për organizimin e saj, pasi përveç organizimit të saj ka edhe një qëllim tjetër të qartë, që janë zgjedhjet e ardhshme lokale”, u shpreh ajo në “EuroNews”.
Sipas Cakës në LSI nevojitet një rifreskim një gjithë strukturave drejtuese në funksion të përgatitjeve për zgjedhjet e ardhshme lokale.
“Pjesa më e madhe e drejtuesve të forumeve, apo edhe organeve të tjera. Qoftë edhe kryesia sot janë të komanduar dhe do duhet të ketë një rifreskim të këtyre strukturave. Për këtë gjë do të ketë një vendim të Konventës”, shtoi Caka.
Sa i përket protestës së 7 korrikut, i cili pritet të jetë një tjetër moment i konsolidimit të bashkëpunimit të LSI me PD-në e Berishës, ajo u shpreh e gjithë kupola e LSI do të jenë aty.
“Nuk do të jemi figurativisht, por do të jemi aty e gjithë kupola e LSI. Do të jemi të gjithë bashkë me strukturat e LSI të organizuara edhe nga rrethet”, tha ish-deputetja.
