Për shkak të vendimit “non grata”, Berisha po jep shenja se do jetë ekuivalent psiko-komik i Selami Jenisherit/ Nëse Basha e kalon këtë “provim” të fundit para të cilit e ka vënë Amerika, atëherë ai nuk do jetë më kryetar “krimb mëndafshi” brenda “fshikëzës” së Sali Berishës, ndërsa PD nuk do jetë “çiflik” i tij me 700 mijë “skllevër” që e brohorasin për forcë zakoni, të mësuar prej 30 vitesh me këtë “skllavopronar”, që tashmë ka shumë llogari me drejtësinë e re
Pas vendimit “non grata” më 19 maj; Sali Berishës iu dha goditja tjetër e fortë publike nga SHBA, këtë herë me mesazhin për të mos guxuar të futet në parlament, apo të krijojë trazira me fanatikët eksremistë dhe kriminelët e tij, nëse Prokuroria e KQZ i bllokojnë mandatin e deputetit.
Barra për ta larguar Sali Berishën nga PD, iu la në shpinë Lulzim Bashës, me thirrjen e bërë troç nga ambasadorja Yuri Kim; që në parlamentin e ri; si kryetar partie, të mos shkojë duke patur në krahë deputet të listës së zezë, që në SHQUP është Berisha, por edhe ndonjë tjetër.
Me këtë thirrje të SHBA, Lulzim Basha nuk mund të bëjë më lojëra, siç ka bërë deri sot, duke heshtur e qeshur sa herë e pyesin mediat, por duhet të zgjedhë publikisht vetëm një rrugë: ta largojë, ose ta mbajë Sali Berishën.
Madje Basha, i njohur për dredhi që të “lë kopilin në prehër”, nuk ka asnjë hapësirë për të penetruar, duke e transferuar çështjen te kryesia e PD, te grupi parlamentar e Këshilli Kombëtar, ku siç dihet 99% e tyre janë “ushtarë” të Berishës.
Kjo detyrë që i ka lënë SHBA, për të shporrur Sali Berishën nga PD, është “provim vjeshte” për Lulzim Bashën, që duhej ta kishte dhënë në pranverë, duke mos e futur në listën e kandidatëve; dhe në verë, kur ai u shpall familjarisht “non grata”.
“Provimin” e muajit prill, Basha e nuk kaloi, sepse u gjunjëzua dhe futi Berishën në listën e kandidatëve për deputet; paçka se SHBA i bëri thirrje për ta lënë jashtë parlamentit; por kjo kërkonte pavarësi e guxim, tregues që Basha nuk i ka.
“Provimin” e dytë për ta shporrur, Lulzim Basha e humbi më 19 maj 2021, kur Sali Berisha u shpall “non grata” nga Departamenti Amerikan i Shtetit; mirëpo Basha, si dredharak që është, nuk veproi ngaqë për shkak të humbjes së zgjedhjeve, kishte frikë se me largimin e Berishës, do humbiste postin e kryetarit në kongres.
Këtë frikë, Basha e provoi në kongresin e 17 korrikut, ku 6000 delegatë të ulur në 2000 karrige, po e dëgjonin Bashën sikur u fliste brigadieri i kooperativës, ndërsa Berishën e pritën me lule dhe brohoritje si “perandor” të kësaj partie.
Tashmë, Bashës i ka ikur frika për rrëzim në kongres; alibinë e humbjes në zgjedhje e gjeti; pastrimin e PD nga rebelët dhe rivalët e bëri; hija e rikthimit të Berishës në krye të PD iu zhduk.
Me SHBA në krahë si mbështetje, Bashës i ka ngelur detyra e largimit të Berishës nga PD, si e vetmja provë që ai duhet të japë; së pari për të çliruar këtë parti nga kthetrat e pengmarrësit kriminalizimit të saj prej 30 vitesh.
Dhe së dyti, për të fituar para anëtarëve të PD, para shqiptarëve e para SHBA-BE, personalitetin e humbur si karakter; dhe moralin e fuqinë e munguar si kryetar real i kësaj partie, që me Berishën “de facto” në krye, nuk ka për të bërë hajër.
Muaji gusht për Lulzim Bashën, është sezoni i “provimit të vjeshtës”, madje i fundit që do tregojë nëse do t’i përgjigjet poozitivisht “tezës” së SHBA për shporrjen e Sali Berishës nga PD.
Natyrisht, që Basha nuk mund ta ndalojë dot Berishën të futet në parlament, përveç Drejtorisë së Dekriminalizimit në Prokurorinë e Përgjthshme e KQZ-së me bllokim mandati, ose SPAK-ut me prangosje para se të fillojë legjislatura e 9 shtatorit; por Basha ka detyrimin si kryetar partie, të mos e regjistrojë Sali Berishën në grupin parlamentar të PD e ta ndalojë të flasë si deputet i saj.
Nëse Basha e kalon këtë “provim” të fundit para të cilit e ka vënë Amerika, atëherë ai nuk do jetë më kryetar “krimb mëndafshi” brenda “fshikëzës” së Sali Berishës; ndërsa PD nuk do jetë “çiflik” i tij si në këto 30 vite dhe as mburojë para drejtësisë së re./Pamfleti
