Akuzat për manipulimin e zgjedhjeve në futboll kanë rezultuar të vërteta, të paktën për dy pjestarë të klubit të Erzenit, skuadrën që momentalisht emëton në Kategorinë e Parë të kampionatit shqiptar të futbollit.
Mësohet se janë vënë në hetim kryetari i Shoqatës FK Erzeni, Marjus Shahini si edhe anëtari Fundim Dollaku. Shahini dhe Dollaku kanë shpërdoruar detyrën dhe kompetencat, pasi falsifikuan firmat dhe votuan në emër të klubit, pa marrë miratimin e Bashkisë së Shijakut. Policia bën me dije se ndaj tyre rëndojnë akuzat për veprat penale “Mashtrimi”, “Shpërdorimi i kompetencave” dhe “Shpërdorimi i detyrës”. Materialet i kaluan Prokurorisë së Shkallës së Parë Durrës, për veprime të mëtejshme procedurale.
Njoftimi i policisë:
Shpërdoruan detyrën dhe kompetencat, procedohen penalisht kryetari dhe anëtari i shoqatës KF Erzeni.
Specialistët për Hetimin e Krimit Ekonomik-Financiar Durrës proceduan penalisht shtetasit M. Sh., me detyrë kryetari i shoqatës së Klubit të Futbollit Erzeni dhe F. D., anëtar i shoqatës së Klubit të Futbollit Erzeni, për veprat penale “Mashtrimi”, “Shpërdorimi i kompetencave” dhe “Shpërdorimi i detyrës”.
Për këta shtetas është bërë kallëzim nga ana e Drejtorisë së Shumë Sporteve në Bashkinë Shijak, se dyshohet që shtetasit M. Sh. dhe F. D., në bashkëpunim me njëri-tjetrin, kanë shpërdoruar detyrën dhe kompetencat, duke përfaqësuar shoqatën e Klubit të Futbollit, në mbledhje dhe votime, pa lejen e drejtuesve të bashkisë Shijak.
Materialet i kaluan Prokurorisë së Shkallës së Parë Durrës, për veprime të mëtejshme procedurale.
