Deputeti Luçiano Boçi, i cili është mandatuar nga Komisionit i Rithemelimit të Berishës për negociatat për presidentin me opozitën, ka reaguar pas marrëveshjes mes opozitës dhe PS për presidentin e ri.
Boçi i konsideron false dhe një tallje bisedimet mes Partisë Socialiste dhe Enkelejd Alibeajt.
Deputeti i Rithemelimit gjithashtu theksoi se është kundër paktit me PS dhe se sipas tij opozita duhet të ketë kandidatë në të pestë raundet.
“Zgjidhja është ‘sui generis’. Dikush nga mazhoranca ka propozuar se opozita mund të ketë kandidat në tre raundet e para, ndërsa në raundet e tjera nuk mund të ketë. Mazhoranca që i ka votat e ruan propozimin e saj për raundet e katërt dhe të pestë. Pse duhet të ndërtojmë një proces të tillë tallës?”, tha ai teksa e vuri theksin edhe te fakti që Alibeaj nuk është mandatuar nga asnjë institucion i Partisë Demokratike.
“Nga ana tjetër Kushtetuta e thotë qartë se negociatat janë tërësisht politike, jo të grupeve parlamentare. Balla, Gjiknuri dhe Spiropali janë të mandatuar nga partia ndërsa Alibeaj nuk ka asnjë mandate të dhënë nga partia apo grupi parlamentar”, shtoi Boçi.
