Prokuroria e Posaçme kundër Krimit të Organizuar dhe Korrupsionit ka kërkuar burgim të përjetshëm për Orges Bilbilin dhe Anterio Kaloshin, të akuzuar për masakrën e Lushnjes më 11 tetor 2017.
Dy shtetasit në përpjekje për të eliminuar nipin e Aldo Bares, lanë të vdekur Zamir Latifin, Jurgen Hoxhën, si dhe plagosën Marjus Xhepexhiun e Bujar Turkun. Ndërkohë, për këtë ngjarje, vijon të jetë në kërkim Laert Haxhiu.
Prokuroria e Posaçme i akuzon të tre si pjesëmarrës në grup kriminal dhe autorë të disa vrasjeve me paramendim në zonën e Lushnjes dhe jo vetëm.
Orges Bilbili u dënua me 5 vite burg në mars të këtij viti, pasi u cilësua fajtor për “armëmbajtje pa leje” dhe “kanosje për shkak të detyrës”, të punonjësit të policisë në momentin e arrestimit të tij.
Më 10 prill 2020, teksa ishte në kërkim për akuzën e vrasjes, Orges Bilbili u plagos me armë zjarri nga një punonjës policie. Ngjarja ndodhi në zonën e Xhamllikut në kryeqytet. Bilbili u qëllua pasi dyshohet se i drejtoi pistoletën policit që deshi ta ndalojë për t’i verifikuar lejen e lëvizjes në ditë karantine, pa ditur se kishte të bënte me një të kërkuar.
