Organizata Botërore e Shëndetësisë do të zhvillojë një mbledhje urgjente këtë të premte, pasi janë regjistruar mbi 100 raste të lisë së majmunëve në Europë.
Deri më tani, rastet janë konfirmuar në pesë shtete europiane, Mbretëri e Bashkuar, Spanjë, Portugali, Gjermani, Itali si dhe në Shtetet e Bashkuara, Kanada dhe Australi. Lija e majmunëve është shumë e ngjashme me linë e zakonshme, mirëpo më pak e transmetueshme. Ajo është përhapur kryesisht në Afrikën Perëndimore, shkruan Reuters.
Sëmundja zakonisht zgjat dy deri në katër javë dhe simptomat mund të shfaqen diku nga pesë deri në 21 ditë pas infektimit. Shkencëtarët nuk parashikojnë që kjo sëmundje të marrë përmasat e një pandemie si COVID-19, duke qenë se virusi nuk përhapet aq lehtë sa SARS-COV-2.
Rasti i parë i lisë së majmunëve në Europë u konfirmua më 7 maj, te një individ i kthyer në Angli nga Nigeria.
