Federata Shqiptare e Futbollit së bashku me Ligën Profesioniste të Futbollit kanë zhvilluar një mbledhje ditën e sotme, ku vendosën t’i drejtohen Qeverisë, me një kërkesë zyrtare për ndryshimin e Ligjit të Sponsorizimeve. Çështja e Ligjit të Sponsorizimeve ka qenë prezent dhe vitin e kaluar ku nisi dhe bojkoti i skuadrave shqiptare:
Njoftimi i Federatës Shqiptare të Futbollit:
“Liga Profesioniste e Futbollit dhe Federata Shqiptare e Futbollit, në mbledhjen e zhvilluar ditën e sotme, vendosën t’i drejtohen me një kërkesë zyrtare Qeverisë dhe Kuvendit të Shqipërisë për ndryshimin e Ligjit të Sponsorizimeve, si një kërkesë jetike e futbollit dhe sportit shqiptar.
Në mbledhjen e zhvilluar sot, ku ishin të pranishëm 10 drejtuesit e klubeve pjesëmarrëse në Abissnet Superiore dhe Presidenti i FSHF-së, Armand Duka, u diskutua në lidhje me këtë kërkesë dhe u bënë propozime konkrete për mënyrën se si do të vijojë dialogu me përfaqësuesit e Qeverisë dhe Kuvendit për ndryshimin e ligjit për sponsorizmet në sport.
Liga Profesioniste e Futbollit sëbashku me FSHF-në do të riaktivizojnë negociatat me të gjithë institucionet dhe aktorët përgjegjës për të finalizuar ndryshimet ligjore që do t’i japin një frymëmarrje të madhe sportit shqiptar.”
