58-vjeçari Fetah Mara, i cili mbyti, zhveshi dhe hodhi në një kanal në fshatin Kozare 63-vjeçaren Fatime Suli është lënë në burg nga Gjykata e Beratit. Ai është përballur sot me togat e zeza, për tu njohur me masën sigurisë, ku gjatë një seance që zgjati rreth 60-minuta, është kërkuar vlerësimi ‘i ligjshëm’ i arrestimit të tij dhe caktimi e masës së sigurisë “arrest në burg” pa afat.
Në lidhje me faktin që gruaja u gjet gjysme e zhveshur në kanal, vrasësi ka deklaruar para gjykatës se në momentin e tërheqjes zvarrë për ta hedhur në kanal, i janë hequr tutat.
Idris Kazazi, avokati i vrasësit, i caktuar nga shteti, ka deklaruar se vrasësi e ka pranuar krimin dhe ka shprehur pendesë. Sipas avokatit ka qenë viktima e cila i ka pasur borxh vrasësit një sasi parash.
Ngjarja e rëndë ndodhi mbrëmjen e 20 Janarit në lagjen “Havaleas” në fshatin Kozare. 63-vjeçarja Fatime Suli u gjet e vdekur në një kanal, gjysëm e zhveshur dhe e mbuluar me gjethe. Familjarët e saj e kishin kërkuar prej disa orësh dhe pasi nuk e kishin gjetur, kishin njoftuar për ndihmë policinë. Vetëm pas rreth 1-orë kërkimesh, gruaja 63-vjeçe u gjet në një kanal, rreth 1 km larg banesës saj.
Viktima Fatime Suli u transportua drejt Morgut të Spitalit Rajonal Berat, ku pas kryerjes së autopsisë mjeko-ligjore, rezultoi se shkaku i vdekjes së 63-vjeçares ishte asfiksimi nga mbytja me duar. Konfirmimi i vrasjes së gruas vuri në lëvizje policinë e Beratit, për të identifikuar dhe arrestuar autorin e kësaj ngjarjeje të rëndë. Pas pyetjes së dëshmitarëve në vendngjarje si dhe vëzhgimit të disa kamerave në bizneset përreth, u arrestua 58-vjeçari Fetah Marra, që rezulton të jetë komshiu dhe krushku i viktimës. Autori i vrasjes e pranoi krimin e rëndë por nuk ka dhënë detaje në lidhje me faktin pse gruaja ishte gjysëm e zhveshur në kanal.
Të shumta kanë qenë ditën e djeshme edhe reagimet e familjarëve, të afërmve dhe komshinjve të familjes Suli në fshatin Moravë, të cilët janë dyshues në lidhje me shkaqet e vërteta të vrasjes,d uke shkuar edhe më tej kur akuzojnë vrasësin se mund të ketë dashur të abuzojë me gruan 63-vjeçe.
