Sekretari ligjor i PD, Çlirim Gjata i ftuar në një emision televiziv, ka pranuar se do të jetë pjesë e tubimit të thirrur nga Presidenti Meta në 2 mars. Gjata ka rrëfyer se krahu i djathtë opozitar nuk ka pasur kurrë hezitim për t’u bërë pjesë, pavarësisht se kreu i PD e pranoi dje për t’u bërë pjesë e kësaj proteste.
Teksa tha se jo vetëm ai, por edhe opozita do të shkonin në tubim në radhë të parë si qytetarë të thjeshtë në mbrojtje të kushtetutës, Gjata argumentoi vonesën e konfirmimit të pjesëmarrjes nga ana e kryedemokratit me faktin se PD është një parti disiplinare, që funksionon mbi bazën e strukturave.
“Ne marrim pjesë e para si qytetarë, pastaj si opozitë. Që kur kemi dalë në protesta, që në shkurt u kemi thënë shqiptarëve dil për veten jo për PD. Ne po udhëheqim pakënaqësinë, jo të rrëzojmë këtë parti, të vijmë në pushtet, PD do vijë në pushtet me zgjedhje demokratike. 2 marsi kërkon rikthimin e kushtetutshmërisë në vend. Për këtë i bashkohemi presidentit”, tha z. Gjata.
