Drejtori i Kabinetit në Presidencë, Edmond Panariti ka zbuluar elementë nga planet e Ilir Metës pas përfundimit të mandatit më 24 korrik. Për ‘Frontline’, Panariti tha se Meta do të jetë aktiv në politikë, sikurse e ka pohuar edhe vetë, por sinjalet janë që synon diçka përtej LSI-së.
“Këtu nuk ka mister, ai ka deklaruar që do të jetë pjesë e politikës, riintegrimi i tij mbetet për tu parë. Janë dhënë sinjale që synon diçka përtej LSI , një bashkim, mbetet për t’u parë…Ka një projekt politik që do ta bëjë publik në kohën e duhur… E sigurt është që ky projekt politik i bashkimit të opozitës do të jetë pjesë e zotit Meta. Unë nëse do jem në politikë aktive, normalisht mund të ketë edhe figura të reja, sa për mua niveli i angazhimit mbetet për tu parë”, tha ai.
Ende nuk dihet se çfarë ka në kokë Meta, pasi me të zbritur nga “kali”, si person pa imunitet që është, mundësitë për të lëvizur lirshëm, larg syrit të drejtësisë, i ka të kushtëzuara. Edhe pse, vlen të theksohet se gjatë daljeve mediatike Presidenti në detyrë ka lënë që të kuptohet se do të krijojë një forcë të re opozitare në vend, përmes bashkëpunimit me Plakun “nongrata”, Sali Berisha. Sidoqoftë ka qenë i rezervuar për detajet.
