Ditën e hënë, Besnik Muçi, “zari” i Ilir Metës i emëruar prej tij Anëtar i Gjykatës Kushtetuese më 15 tetor dhe i shkarkuar pas 1 muaji nga OMN-SHBA me “Veting”, deklaroi në një media shqiptare, se krerët e politikës të zhytur në korrupsion e krime, nuk preken dot as nga Prokuroria e SPAK, ngaqë shefat e tyre kanë akoma vartësi, presion e frikë nga politika
Qysh në ditën e parë të detyrës në Shqipëri, Ambasadorja e SHBA, Yuri Kim, e bindur me prova, se kupola politike-shtetërore, është strukturuar si grup 5-6 familjesh mafioze të pa prekura nga drejtësia, bëri një deklaratë të fortë, me 4 mesazhe ultimative ndaj tyre:
- Ndalimi i skenarëve, që bllokojnë reformën në drejtësi.
- Spastrimi i drejtësisë, nga individë e struktura kriminale.
- Spastrimi dhe shkëputja e kupolave partiake, nga lidhjet me grupet e krimit.
- Ngritjen brenda muajit nëntor të BKH; dhe Gjykata Kushtetuese, brenda vitit 2020.
Këto realitete të apeluara nga ambasadorja Yuri Kim, kanë qenë e janë, “mekanizmi” që ka kapur partitë, parlamentin e drejtësinë dhe ka grabitur ekonominë, me pasojë situatën aktuale.
Nuk është e lehtë, që në vende si Shqipëria, të shkulësh një strukturë të tillë mafioze të fuqizuar prej 30 vitesh, me pushtet absolut familjesh e fisesh, me financa e pasuri gjigande, me trafiqe e koncesione ekonomike monopol, me grupe kriminale të sofitikuara e me popull jo reagues.
Megjithë fuqinë e krimit, që ka “gjenerator e mburojë” shtetin; mezazhet e ambasadores Yuri Kim, dhanë efektet e para, të cilat duken qartë në këto qëndrime të kupolës politike:
– Distancimi i heshtur i Edi Ramës, nga grupet “Dako-Doshi-Sejdini” duke i nxjerrë nga struktura partiake dhe përpjekja e tij tinëzare, për të krijuar imazh anti-krim personal.
– Spastrimi i dytë, që bëri Basha në kupolën e PD, me marifetin e gjoja zgjedhjes së kandidatëve për deputetë nga anëtarësia dhe 20% e listës në dorë të tij, shoqëruar me braktisjen e protestave.
– Ndryshimi i sjelljes së Monika Kryemadhit, duke bërë politikë me “edukatë” e pa kërcënime histerike kundër reformës në drejtësi e ndërkombëtarëve, madje edhe kundër Ramës.
– Përpëlitjet e dyshes Berisha-Basha, për t’u dukur “pa mëkate”; tërheqja e tyre nga skema për të bllokuar reformën në drejtësi dhe distancimi i plotë, nga mbrojtja e bandës së gjyqtarëve e prokurorëve të shkarkuar.
Këto sjellje të pa para në 30 vite, janë tregues i një starti bindës e shpresues për ne shqiptarët; në platformën amerikane me drejtësinë e re.
Një gjë është e kuptueshme: SHBA nuk po investon, për të spastruar “të fortët” e lagjeve, por ka subjekt ndëshkimi mafien politike dhe strukturat sipërore të krimit, që janë të lidhura si pjesë apo si shërbim me mafien politike-shtetërore.
Edhe pse ky sinjal është i qartë, në reagimet e disa pjesëve të lodhura të shoqërisë shqiptare, ka ende doza mosbesimi tek kjo platformë, të cilën ambasadorja Yuri Kim, po e imponon për zbatim, duke u bërë palë me interesin publik shqiptar.
Me të drejtë, shoqëria e nëpërkëmbur, vjedhur e shkatërruar në çdo aspekt nga bandat partiake të 30 viteve tranzicion; po pyesin përse nuk po preken akoma, kokat e mafies politike!
Mesazhet ultimative të ambasadores Yuri Kim, për drejtësi në nivele të larta, janë shoqëruar me mikëqyrjen direkte e të plotë, të krijimit e trajnimit të strukturës BKH.
Kaq duhet të na kujtojë, atë çfarë është bërë në kupolat politike të vendeve të tjera si psh., Kroacia apo siç ka nisur në Maqedoni; shembuj që tregojnë, se Amerika e… “kap lepurin me qerre”./Pamfleti
