Shkruar nga Pamfleti
Meta, Berisha apo Rama? Hoxha tregon cilët politikanë fshihen pas Balilit dhe kujt i shërben 'bosi' i krimit
Gazetari investigativ, Artan Hoxha, ka folur për lidhjet e ‘Eskobarit të Ballkanit’, Klement Balili, me politikën shqiptare. Në emisionin ‘Top Talk’, gazetari Hoxha theksoi se pikërisht përfshirja e Balilit në jetën politike, ajo që e ekspozoi më shumë atë dhe i krijoi probleme, ndërsa shtoi se vendimi për t’u dorëzuar ka shqetësuar politikanë të shumtë.
“Problemi i tij kryesor është fakti që u përfshi në jetën politike, gjë që e solli në rrethanat ku është sot. Madje dua të theksoj se dorëzimi i tij ka shqetësuar shumë disa njerëz mjaft të rëndësishëm të politikës në vend”, deklaroi Hoxha.
Ai shtoi se Balili është cilësuar si “njeriu i të gjithëve”, pasi është akuzuar se u shërben politikanëve të ndryshëm.
“Aftësia e një bosi jetëgjatë të krimit, është nuhatja e tij për lëvizjet e mëdha politike. për Balilin është aluduar shumë, për ta lidhur me emra të caktuar të politikës, por vetë ai ka mbështetur politikisht ata që kanë qenë në pushtet”, theksoi Hoxha.
