Kulture 7 Shkurt 2022, 20:09

Meta kërcënon të mbyllë ‘Facebook’ dhe ‘Instagram’ në Europë

Shkruar nga Pamfleti
Meta kërcënon të mbyllë ‘Facebook’ dhe

Meta kërcënon të mbyllë 'Facebook' dhe 'Instagram' në Europë

“Meta Platforms Inc.” ka kërcënuar se do të mbyllë Facebook dhe Instagram në Europë, nëse nuk mund të vazhdojnë transferimin e të dhënave të përdoruesve në SHBA.

Rregullatorët e Bashkimit Evropian kanë ngecur për muaj të tërë në negociata me SHBA-në për të zëvendësuar një pakt transatlantik të transferimit të të dhënave, në të cilin u mbështetën mijëra kompani, por që u hodh poshtë nga Gjykata e Drejtësisë së BE-së në vitin 2020 për shkak të frikës se të dhënat e qytetarëve nuk janë të sigurta, nëse dërgohen në SHBA.

Në raportin e saj vjetor të botuar të enjten, Meta tha se “nëse nuk mund të mbështetet në marrëveshje të reja ose ekzistuese, si të ashtuquajturat klauzola standarde kontraktuale, për të zhvendosur të dhënat, atëherë ka gjasa të mos jetë në gjendje të ofrojë një numër të produkteve dhe shërbimeve më të rëndësishme, duke përfshirë Facebook dhe Instagram, në Europë.”

Meta ka paralajmëruar tashmë në raportin e saj të mëparshëm vjetor se nëse nuk i lejohet të përdorë klauzola standarde kontraktuale, nuk do të mund të operojë pjesë të biznesit të saj në Europë, pa përmendur dy platformat kryesore të mediave sociale.

“Ne nuk kemi absolutisht asnjë dëshirë dhe asnjë plan për t’u tërhequr nga Europa, por realiteti i thjeshtë është se Meta dhe shumë biznese, organizata dhe shërbime të tjera, mbështeten në transferimin e të dhënave midis BE-së dhe SHBA-së për të operuar shërbimet globale”- tha zëdhënësi i Meta në një deklaratë të dërguar me email.

Komentet e fundit theksojnë tensionin në rritje midis kompanisë së mediave sociale dhe ligjvënësve mbi pronësinë e të dhënave të përdoruesve. Aksioni pësoi një rënie prej 26% të enjten për shkak të frikës në lidhje me perspektivën e Facebook, e cila prodhoi fshirjen më të madhe të vlerës në historinë e tregut të aksioneve. Aksionet e Meta ranë deri në 4.5% në tregtimin e Nju Jorkut të hënën.

“Gjigantët digjitalë duhet të kuptojnë se kontinenti europian do të rezistojë dhe do të afirmojë sovranitetin e tij”, tha të hënën në Paris ministri francez i Financave Bruno Le Maire.

Komisioni Europian tha se negociatat për transferimin e të dhënave me Uashingtonin janë intensifikuar, “por ato kërkojnë kohë duke pasur parasysh gjithashtu kompleksitetin e çështjeve të diskutuara dhe nevojën për të vendosur një ekuilibër midis privatësisë dhe sigurisë kombëtare”, shkroi një zëdhënës i komisionit në një deklaratë për Bloomberg të hënën.

Vetëm një marrëveshje që është plotësisht në përputhje me kërkesat e vendosura nga gjykata e BE-së mund të sigurojë stabilitetin dhe sigurinë ligjore që presin palët e interesuara në të dy anët e Atlantikut,” shtoi zëdhënësi.

Teknologji Europë Facebook Instagram Meta