Përfundon ndeshja e javës së 18 në Serinë A. Milani ka bërë detyrën ndaj Kaljarit duke e mundur me rezultatin e pastër 2-0. Zlatan Ibrahimoviç ishte heroi i kuqezinjve me 2 golat e shënuar. Suedezi është kthyer dhe gjeti menjëherë rrjetën. Sulmuesi shtatlartë ktheu në gol një penallti në minutën e 6. 39-vjeçari e fitoi vetë 11-metërshin dhe e dërgoi topin në rrjetë.
Në minutën e 52, ekipi i Stefano Piolit dyfishoi shifrat me Zlatan Ibrahimoviç, i cili shënoi dopietën e tij personale në këtë ndeshje. Ai mori një top të gjatë nga mbrojtja dhe e dërgoi në rrjetë. Gjyqtari e anuloi golin, por ishte VAR që mori vendimin përfundimtar për ta lënë golin në fuqi.
Milani u detyrua ta mbyllte këtë takim me 10 lojtarë, pasi Salamakers u ndëshkua me karton të kuq në minutën e 75. Një mungesë e madhe për kuqezinjtë në ndeshjen e ardhshme me Atalantën, duke parë mungesat në skuadër për shkak të Koronavirusit.
Me këtë fitore, Milani ruan kryesimin me 43 pikë, ndërsa Kaljari renditet në vendin e 17 me 14 pikë.
Në ndeshjen tjetër, Arsenali ka mundur pastër 3-0 Njukasëllin. “Topçinjtë” zhbllokuan shifrat në minutën e 50 me Aubamejang, që ndërmori një kundërsulm personal dhe bëri gjithçka mirë duke dërguar topin në rrjetë me një lëvizje mjaft të mirë.
Goli i dytë u shënua nga talenti Saka. Ky i fundit shfrytëzoi mirë një mundësi të krijuar dhe përshëndeti rrjetën. Auba shënoi dhe golin e tretë duke i vendosur kapak sfidës në minutën e 77. Xhaka luajti 90 minuta të plota, duke qenë ndër më të mirët e ekipit.
Me këtë fitore, Arsenali ngjitet në vendin e 10 me 27 pikë, ndërsa Njukasëll mban vendin e 15 me 19 pikë.
