Kjo e diel ka qenë mjaft e veçantë, jo vetëm se shënon 109 vite pavarësi për shtetin shqiptar, por edhe për shkak se në qytetin e Durrësit u luajt një tjetër vëllazërore mes Shqipërisë dhe Kosovës.
Ndeshja mes veteranëve të Shqipërisë dhe Kosovës është mbyllur me triumfin e “Dardanëve” vetëm pas goditjes së 11-metërshave.
Kombëtarja zbriti në fushë me legjendat e futbollit me emra si Ilir Bozhiqi, Hysen Zmijani, Alpin Gallo, Armend Dallku, Ardian Mema, Ilir Lame, Ilir Alliu, Agustin Kola, Fatbardh Jera, Migen Memelli dhe Roland Iliadhi, ndërsa trajner i kuqezinjve ishte Sulejman Mema.
Koha e rregullt përfundoi me rezultatin 1-1, ndërsa te penalltitë “Dardanët” u treguan më të saktë, duke triumfuar me rezultatin 10-11.
Një sfidë mjaft e bukur dhe e veçantë që u luajt nën ritmin e ‘’fair-play’’, për të mos ngarkuar së tepërmi gjendjen fizike të pjesëmarrësve.
Pas ndeshjes, u mbajt dhe një ceremoni simbolike ku fituesit iu dorëzua një Kupë simbolike.
