Deri në zgjedhjet e ardhshme duhen edhe gati 3 muaj, por politikanët nuk dinë të ndalen duke sulmuar njëri tjetrin.
Sot 10 vite pas ngjarjeve tragjike të 21 janarit, Sekretari i Përgjithshëm i Partisë Socialiste, Taulant Balla u bëri thirrje qytetarëve të mos harrojnë kush qëllon mbi popullin dhe nuk paraqitet kurrë para drejtësisë, madje gradohet.
“Mos harroni të kujtoni që Partia Demokratike me Sali Berishën dhe këtë kollovarin aktual, kanë vrarë për të mbajtur pushtetin. Ne nuk duhet të harrojmë kurrë që nesër 10 vite më parë, Sali Berisha urdhëroi të qëllohej mbi popullin e vet dhe Lulzim Basha, si Ministër i Brendshëm i asaj kohe nuk mori asnjë përgjegjësi, madje u gradua nga Sali Berisha në krye të Bashkisë së Tiranës duke vjedhur votat”.
Ndërkaq, ka kujtuar edhe rastin tragjik të vrasjes së Klodian Rashës, Balla tha se qëndrimi i PS-së vendos standardin e dorëheqjes së Ministrit të Brendshëm edhe pse pa përgjegjësi direkte.
Ai u shpreh: “Gjithë të rinjve e të rejave që këto u duken histori unë dua t’u them se Partia Socialiste e Shqipërisë, në rastin e vrasjes tragjike të Klodian Rashës, mbajti një qëndrim të fortë duke i kërkuar drejtësisë të bëjë drejtësi, dhe kjo e fundit po bën drejtësi. Por, edhe pse pa përgjegjësi direkte, ministri i Brendshëm dha dorëheqjen. Sepse ky është standardi i vendosur nga PS. Kur Saliu urdhëronte dhe Basha ekzekutonte në 21 Janar 2011, Basha, jo vetëm që nuk mori asnjë përgjegjësi, jo vetëm që nuk shkoi kurrë para drejtësisë, por edhe u gradua. Pas 10 vitesh drejtësia nuk është vënë. Drejtësia nuk mund të mjaftohet me 2-3 gardistë që shkrepën këmbëzën ndërsa nuk u thirr ai që del në TV dhe deklaron se ka dhënë urdhërin për të qëlluar mbi popullin e tij.”
