Kreu i grupit parlamentar të Partisë Socialiste, Taulant Balla, ka vijuar replikën në distancë me djalin e ish-kryeministrit Sali Berisha, Shkëlzen Berisha, me të cilin është në një proces gjyqësor për shpifje.
Balla, i cili nuk ishte sot i pranishëm gjatë seancës në Gjykatën e Tiranës, shpjegoi se kjo ndodhi për shkak të angazhimeve të tija si deputet. Ai tha se nuk do të ndalet derisa Shkëlzen Berisha, të marrë, sipas tij, ndëshkimin për dosjen CEZ. Balla ishte njëherësh dhe kreu i komisionit parlamentar hetimor për privatizimin e OSHE tek CEZ.
“Shkëlzen Sali Berisha! Paske bilbilosur para Gjykatës sot në mungesën time dhe qenke trimëruar mesa shoh para gazetarëve, por mos të të rrejë mendja se do shpëtosh dot pa u ndëshkuar në dosjen CEZ!
E pata të pamundur të jem sot aty përballë teje për arsye angazhimi si deputet në qarkun e Elbasanit, por herën tjetër do marr masat që të mos mungoj. Tani që të iku edhe babi nga Parlamenti njëherë e mirë, do të të përkushtohem me të gjithë seriozitetin që meriton një thëngjill i zbuluar si ti. Bëhu gati Zen se halle të mëdha të presin”, shkruan Balla në rrjetet sociale.
