Shkruar nga Pamfleti
Ministri i Financave, Hekuran Murati gjatë interpelancës të premten në Kuvendin e Kosovës lidhur me mosekzekutimin e pagave të mësimdhënësve, ka thënë se duhet të sigurohen që organizatat buxhetore të respektojnë ligjin.
“Nuk mund të paguhet dikush pa punuar, kjo është çështja dhe mbi këtë bazë ne duhet të sigurohemi se organizatat buxhetore e respektojnë ligjin. Ka tendencë që paraja publike të shpenzohet pa qenë në përputhje me të gjitha ligjet në fuqi”, ka thënë Murati gjatë fjalës së tij para deputetëve.
Ai është thirrur për këtë sërish në nenin 18 të Ligjit për Greva.
“Në rastin e ngritur këtu për interpelancë bëhet fjalë për pagesën e punëtorëve apo stafit që janë apo kanë qenë në grevë, ligji për grevat, neni 18 paragrafi 1 e thekson qartë se përgjatë kohës sa personat ose punëmarrësit janë në grevë marrëdhënia e punës pra obligimet nga kontrata e punës që ka të bëjë detyrimi për të punuar por edhe obligimi për të paguar pra pezullohen, me fjalë të tjera nuk mund të paguhet dikush pa punuar, pra kjo është çështja dhe mbi këtë bazë normalisht që ne duhet të kërkojmë dhe sigurohemi që organizatat buxhetore e respektojnë ligjin, këtë e kemi bërë dhe këtë do ta bëjmë çdo herë sa herë që shohim apo vihemi në dijeni që ka bazë për dyshime se nuk përfillen ligjet dhe ka tendencë që paraja publike të shpenzohet pa qenë në përputhje me të gjitha ligjet në fuqi”, ka thënë Murati.
Ministri tha se ata që nuk punojnë nuk duhet të paguhen, mirëpo në grevën e përgjithshme të nisur nga 25 gushti, morën pjesë edhe punëtorët e administratës publike.
Pamfleti ka mësuar se grevistët e këtij sektori, i kanë marrë pagat e muajit shtator, për të cilin mësimdhënësit janë ende në pritje.
Nga Asociacioni i Komunave të Kosovës i është thënë redaksisë se vetëm punëtorët e sektorit të arsimit janë në pritje të ekzekutimit të pagave, për çfarë po shpresohet të ndodhë të premten e 7 tetorit.
